ASNN – Sipas “Tuttosport”, Bobani i ka kërkuar trajnerit Xhampaolo zgjidhjen e 3 problemeve të deritanishme. Përpara derbit, ato duhet të zgjidhen, ka thënë drejtuesi kroat dhe çështjet në fjalë janë loja e bukur, aktivizimi i lojtarëve të rinj të ardhur në merkaton e verës dhe situata me Paketën. Fitorja në derbi do të ishte vendimtare për vazhdimësinë e sezonit të Milanit. Skuadra kuqezi shkon në derbin e së shtunën me Interin, me disa probleme për t’u zgjidhur, por edhe disi e qetë moralisht pas fitores së arritur ndaj Veronës.
Përtej kësaj, drejtuesit e klubit kuqezi, i kanë kërkuar sqarime trajnerit Marko Xhampaolo për disa çështje ende të paqarta që duhen zgjidhur sa më shpejt. Sipas të përditshmes sportive shqiptare, “Tuttosport”, Xhampaolo është takuar me Zvonimir Bobanin, e ky i fundit ka kërkuar të kuptojë motivet e 3 episodeve të veçanta që po shqetësojnë klubin milanez. E para bën fjalë për lojën e Milanit deri tani. Arsyeja që u thirr Xhampaolo në drejtimin e Milanit, ishte pikërisht për të risjellë lojën e bukur që ka bërë gjithnjë, në të gjitha skuadrat që ka drejtuar.
Deri tani kuqezinjtë kanë qenë të paorganizuar, pa motiv dhe pa sulm. Pika e dytë, ka qenë, për lojtarët e rinj të ardhur në merkaton e verës. Të gjithë ende nuk kanë patur mundësinë për të luajtur. Deri më sot, së bashku kanë luajtur 155 minuta, 20 minuta për Leaon në Udine e më pas në stol, Ben’naseri 90 minuta me Breshian dhe 45 minuta Rebiçi të dielën me Veronën. Shumë pak, sepse drejtuesit janë të bindur se kanë vënë në dispozicion të Xhampaolos lojtarë me tepër cilësi. Dhe pika e fundit, por jo pa rëndësi, bën fjalë për situatën e Paketës.
Braziliani po vuan për t’u përshtatur me sistemin e lojës së Xhampaolos dhe në rrjetin social “Instagram” ka shprehur diçka. Trajnerit të kuqezinjve i është kërkuar të zgjidhë gjithçka, para së gjithash taktikë, për ta bërë të vlefshëm një nga lojtarët më të rëndësishëm të këtij Milani. Derbi, për të 3 arsyet e lartpërmendura është një rast vendimtar i sezonit. Për të fituar ndeshjen me një lojë të bukur, ndoshta duke aktivizuar edhe futbollistët e rinj. Kështu, Xhampaolo do të fitonte shumë pikë dhe besimin e klubit dhe tifozëve.
