ASNN – Majlinda Kelmendi është shpallur xhudistja më e mirë e botës për vitin 2014. Çmimin prestigjioz xhudistes ia ka dorëzuar Presidenti i Federatës Ndërkombëtare të Xhudos, Marius Vizer, i cili ka vizituar Prishtinën dhe është pritur nga drejtuesit më të lartë të sportit në Kosovë. Presidenti i Federatës Ndërkombëtare të Xhudos, Marius Vizer, ka shpallur në Prishtinë, Majlinda Kelmendin si xhudisten më të mirë në të gjitha kategoritë për këtë vit.

Ky i fundit ka vizituar Prishtinën ku është pritur nga krerët e sportit kosovar. Majlinda është shprehur se ndihet e lumtur që Vizer ka vizituar Kosovën për t’ia dhënë asaj këtë vlerësim të madh. “Kur ishim në Rusi, z. Vizer më patë thënë se do të vijë në Kosovë për të vizituar. Unë jam e lumtur që ai e mbajti premtimin”, – u shpreh Majlinda. “Po të mos ishte ai, unë dhe as federata nuk do të kishim këto suksese”, – shtoi më tutje Kelmendi.

Presidenti i Komitetit Olimpik të Kosovës, Besim Hasani, e kanë falënderuar zyrtarin e xhudos Botërore për gjithçka që ka bërë për Kosovën. “Ne jemi të nderuar me prezencën e një njeriu që ka dhënë një kontribut të jashtëzakonshëm për sportin kosovar”, u shpreh Hasani. “Pa ndihmën e sinqertë të Vizerit ju garantojë se procesi i pranimit të Komitetit Olimpik të Kosovës do të shtyhej edhe për një periudhë të pacaktuar”, – shtoi ai.

Trajneri i Majlinda Kelmendi, Driton Kuka, e ka cilësuar Vizerin “një mik i madh i sportit të Kosovës dhe jo vetëm xhudos”. Ndërsa kreu i xhudos botërore, Marius Vizer, ndër të tjera, u shpreh i lumtur me pranimin e Kosovës në Komitetin Olimpik Ndërkombëtar.