ASNN – Kampionia e botës dhe e Evropës në xhudo, Majlinda Kelmendi, e cila synon medaljen olimpike në “Rio 2016”, ka marrë dritën jeshile nga mjekët përsa i përket dhimbjeve që i ishin shfaqur në shpinë.

Mjekët kanë sqaruar se dhimbjet janë kalimtare dhe nuk do ta pengojnë Kelmendin, e cila gjatë këtij muaji do të konkurrojë në Kampionatin Evropian të Xhudos dhe, gjatë gushtit, në Lojërat Olimpike “Rio 2016”.

Shpresa e Kosovës për medalje olimpike, Majlinda Kelmendi, ka marrë ditët e fundit një lajm të mirë. Xhudistja 24-vjeçare ka mësuar që dhimbjet e shpinës që e kanë shqetësuar për kohë të gjatë nuk janë diçka serioze dhe nuk pritet ta pengojnë atë në rrugëtimin drejt medaljes së artë në Lojërat Olimpike “Rio 2016”.

Në fillim të vitit të shkuar, xhudistja pejane kishte pësuar një dëmtim të gjurit e menjëherë i ishte nënshtruar një operacioni. Rikuperimi nga lëndimi në gju u mbyll me sukses në fillim të verës së kaluar, por ndërkohë asaj iu shfaqën dhimbje në shpinë.

Për këtë arsye, ajo mungoi në Botërorin e vitit të kaluar, që u mbajt në muajin gusht, duke u kthyer në shtator në një garë me ngarkesë shumë më të vogël. Prej atëherë Majlinda nuk ka marrë pjesë në shumë gara.

Ka vazhduar me rezultate maksimale, por telashet me shpinën nuk i janë ndarë asnjëherë. Megjithatë, mjekët tashmë kanë sqaruar se dhimbjet janë kalimtare dhe nuk do ta pengojnë Kelmendin.

Gjatë këtij muaji, xhudistja pejane do të konkurrojë në Kampionatin Evropian të Xhudos për Të Rritur dhe, gjatë gushtit, në Lojërat Olimpike, që mbahen në Rio de Zhaneiro të Brazilit.