ASNN – Nën kujdesin e mjeshtrit të njohur të xhudos shkodrane dhe asaj shqiptare, Anton Shkoza, Klubi Shumësportësh “Vllaznia” në bashkëpunim me Bashkinë Shkodër dhe Akademinë “Albania Judo Kodokan”, me qendër në Vaun e Dejes, sporti i xhudos organizon në qytetin e Shkodrës për të dhjetin vit me radhë Turneun Ndërkombëtar të Xhudos.
Ndërkohë, pesë vitet e fundit, turneu në fjalë titullohet “Nënë Tereza”, dedikuar kësaj figure të madhe të kombit shqiptar, duke synuar që, krahas garës në tapet, të përcjellë edhe mesazhet e paqes, bashkëpunimit dhe harmonisë edhe në komunitetin e sportistëve të xhudos.
Ndeshjeve të zhvilluara ditën e shtunë në Pallatin e Sportit “Qazim Dervishi” të Shkodrës u ka paraprirë një demonstrim mjaft interesant i vajzave xhudiste nga të gjitha ekipet pjesëmarrëse me programin e Artit Marcial “Tai Chi Quan” (Energjia e universit – harmonia e trupit, mendjes, zemrës me natyrën) që kishte për qëllim për t’i dhënë veprimtarisë një dimension më të madh sesa thjeshte të “një gare”.
Të ndarë në dy tapete, xhudistët pjesëmarrës të ekipeve pjesëmarrëse Klub Judo Dalmacia (Split), Klub Judo Borsa (Mostar), Klub Judo “Ilinden” (Sofia), Klubi i Judo-s Ippos (Peje), Klubi i Judo-s Polici (Prishtine), Klubi i Judos Studenti, Judo Kastriori, Judo Vushtria, Judo Trepca, Klupi i Judo-s “Arso Milic” (MNE), Judo klub Tivat, si dhe ekipet e judo-s të Vllaznisë, Akademia Albania Judo Kodokan, Sport Klub “Anton Shkoza”, janë ballafaquar me shumë rivalitet duke tërhequr edhe interesin e publikut vendas.
Mes konkurrentëve kanë qenë edhe dy kampionë Evrope, çka e ka bërë edhe më autoritar zhvillimin e kësaj veprimtarie. Pas një konkurrence të fortë dhe masive fitues i Turneut “Nën Tereza” u shpall Akademia “Albania Judo Kodokan”, nga gjiri i së ciles ishin 9 fitues të vendeve të para si individe, i ndjekur nga klubi i xhudos “Arso Miliç”, me 7 vende të para, dhe Klubi i Xhudos “Ippon Peja”, me 5 fitues.
