ASNN – Xhudo është sporti që po i bën krenarë sportdashësit në Kosovë dhe më gjerë ndër shqiptarët. Dhe nuk është vetëm “xhevahiri” i sportit shqiptar, Majlinda Kelmendi që shkruan histori, por edhe mjaft sportistë të tjerë të rinj, kryesisht ata që stërviten nga trajneri i mirënjohur, Driton Kuka. Së fundmi, edhe nga meshkujt po spikat një sportist me mjaft perspektivë dhe ai është Akil Gjakova.
Në dy vitet e fundit, ai ka pasur një rritje të pabesueshme në xhudo, duke u radhitur aktualisht në vendin e 7-të të listës botërore për peshën deri në 73 kilogramë. Gjakova do të jetë në fundjavë në Paris, vendi ku ai korri një vit më parë një sukses të madh të karrierës së tij, pasi fitoi medaljen e artë në Kampionatin Evropian të Xhudos. Do të jetë një turne “Grend Slem” në Paris.
Një nga më prestigjiozët e xhudos botërore dhe më 10 shkurt 2019, Akil Gjakova do të kujtojë atë sukses të vitit të kaluar, me shpresën se do të rishkruajë historinë në këtë sport dhe në këtë arenë. Gjakova do të kthehet këtë fundjavë në “Accor Hotels Arena of Bercy”, arenën gjigante të sporteve individuale në Paris, e cila ka një kapacitet rreth 15 mijë vende.
Kuptohet, xhudisti nga Kosova do të tentojë të mbrojë titullin e vjetshëm që mori në këtë aktivitet dhe ka shanse reale, pavarësisht vështirësisë dhe rivalitetit shumë të madh. Jo vetëm kaq, por ambiciet e sportistit kampion në xhudon shqiptare në tërësi janë të bëhet numri një në ranglistën botërore të xhudos për peshën deri në 73 kg. Objektivi tjetër madhor është kualifikimi në Olimpiadën e Tokios të vitit 2020.
