ASNN – Kombëtarja shqiptare në volejboll për të rinj është në mbyllje të grumbullimit të vlefshëm për kampionatin ballkanik që zhvillohet nga data 1, deri më 5 gusht 2015 në Ankara të Turqisë. Nën drejtimin e dyshes së trajnerëve Arben Sako dhe Dritan Bardhi, pas testeve fizike, vijuan grumbullimin në kryeqytet. Me kombëtaren që ka në dispozicion për këto finale, kreu i stolit kuqezi beson te një përfaqësim dinjitoz, ndryshe nga sa ka ofruar e kaluara në kësi eventesh ndërkombëtare me grupmoshat.
“Gjatë këtyre ditëve kemi zhvilluar një fazë përgatitore serioze, – ka thënë Sako. – Me të drejtë mund të deklaroj se kemi një brez premtues lojtarësh për të ardhmen e volejbollit shqiptar. E them me bindje se ky brez është i denjë për kombëtaren e të rriturve. E këtu mund të përmend lojtarë si Qafarrena, 2.5 m i gjatë, Qepa, 1.96 m, Baruti, 2.03 metra, organizatorin e talentuar, Arapi, 1.96 m, Mërtiron apo edhe organizatorin e Farka Volej, Deliun.”
“Parashikoj që në kampionatin ballkanik të Ankarasë do të bëjmë një përfaqësim dinjitoz dhe nuk do të mjaftohemi vetëm me pjesëmarrjen”, – vijoi trajneri kuqezi, i cili, përtej konkurrencës së fortë që rezervon Ballkani në volejboll, shpreson se do të synohen edhe fitoret. “Jemi të vetëdijshëm për nivelin e lartë që ka volejbolli serb apo bullgar, megjithatë me rivalët e tjerë, si Bosnjë-Hercegovina, Maqedonia e Rumania, ne do të tentojmë fitoret dhe se asgjë nuk është e pamundur, – ka pohuar ai.
“E kemi dëshmuar edhe më herët një gjë të tillë”, – ka shtuar Sako. Kampionati ballkanik për të rinj është një veprimtari e përvitshme, ku Shqipëria ka munguar për arsye financiare në tre vitet e fundit. Vitin e kaluar Shqipëria e rrjetës mori pjesë vetëm me moshat. Ndërkohë, e privuar nga financat e pamjaftueshme, Federata Shqiptare e Volejbollit nuk merr përsipër të organizojë kampionate ballkanike, ndryshe nga homologët e saj.
Për herë të fundit Shqipëria do të listohej në kalendarin e Federatës Ballkanike në vitin 2013 me organizimin në Tiranë të Kampionatit të Volejbollit të Plazhit për Nën-20-vjeçarët (femra dhe meshkuj), që u mbajtën përkatësisht më 16-18 gusht, dhe më 4-6 tetor me finalen e Kupës Ballkanike për të rritur.
