Ka përfunduar dje në Ankara të Turqisë Kampionati Ballkanik i Volejbollit për Të Rinj, atje ku ka marrë pjesë edhe kombëtarja e Shqipërisë, e cila është drejtuar nga Arben Sako dhe Dritan Bardhi. Duket se tanët ia kanë marrë dorën Maqedonisë, të cilën e kanë mundur dhe finalen për vendet 6-7.
Ndryshe nga ndeshja në grup e tre ditëve më parë, atje ku tanët kanë fituar me vështirësi 3-2, e djeshmja ka qenë një tjetër melodi. Edhe pse me vështirësi në dy setet e para, tanët kanë arritur të triumfojnë 25-23 dhe duke kryesuar 2-0 nuk e kanë pasur më pas të sikletshme për të marrë edhe setin e tretë. 25-16 dhe e gjithë ndeshja 3-0 për tanët.
Ndërsa për ndihmëstrajnerin e kuqezinjve, Bardhi, nëse kjo kombëtare do të kishte ditë grumbullimi më shumë atëherë do të mund të bënte edhe më shumë në këtë Ballkaniadë. “Po të ishim grumbulluar disa ditë më shumë në vendin tonë të jeni të bindur se do të kishim fituar jo vetëm ndaj Greqisë, por dhe ndaj Bosnje-Hercegovinës”, – ka deklaruar ai.
“E them këtë sepse kjo kombëtare kishte më shumë nevojë për t’u njohur me njëri-tjetrin. Deri diku jemi të kënaqur. Por është një ekip që premton”, ka përfunduar trajneri i Farka Volejit, Dritan Bardhi, kurse Shqipëria e të rinjve e ka përfunduar Ballkaniadën në vendin e 6-të mes 7 ekipeve pjesëmarrëse.