ASNN – Pavarsisht humbjes në 3 sete në Zagreb, Kroacia ishte një bankoprovë e mirë për një Kombëtare shqiptare në tranzicion si ajo e volejbollit të femrave. “Nuk është sekret tanimë që kjo skuadër po rindërtohet dhe, si çdo gjë, kërkon kohën e vet për t’u pjekur, sikundër ka ndodhur edhe me brezat e mëparshëm”, – the trajneri Altin Martiri, i cili është shprehur i kënaqur me ecurinë e grupit.
“Në fakt, ajo ndeshje me Kroacinë na erdhi mbarë, sepse na shërbeu si banko-provë për sfidën me Austrinë, – thotë Martiri. – Në përgjithësi, vajzat e reja reaguan mirë, por ka ende shumë punë për të bërë. Por besoj që do të përmirësohemi pas ndeshjeje dhe këtë radhë me Austrinë do të bëjmë edhe disa zgjedhje të ndryshme teknike, për ta shpërqendruar sadopak kundërshtarin.”
Sfida e radhës është një njohje e vjetër si Austria, që me të cilën vajzat kuqezi janë ndeshur 4 herë në dy vitet e fundit në Ligën e Evropës dhe Martirit kjo përballje i krijon një ndjesi familjare. “Në fakt, më duket si një duel Barleti Volej-Partizani, sepse po luajmë shpesh me austriaket”, – thotë trajneri kuqezi duke buzëqeshur. – Por, përtej kësaj, është një skuadër që ka ardhur në rritje në lojën e saj dhe është përmirësuar ndjeshëm.
Takimi i dytë në kuadër të grupit B të Eliminatoreve të Evropianit të Volejbollit për Femra, midis Shqipërisë dhe Austrisë, do të luhet të dielën në mbrëmje, duke nisur nga ora 17:00 dhe do të sillet për sportdashësit drejtpërdrejt nga Rrjeti i Radio-Televizionit Shqiptar. Ndërsa duke nisur nga ora 20:00, po në RTSH Sport, do të vijë edhe sfida e djemve me austriakët.
