ASNN – Shqipëria ka konfirmuar pjesëmarrjen në Ligën e Evropëssi për femra dhe meshkuj për të dytin vit radhazi dhe, për presidentin e Federatës Shqiptare të Volejbollit, Erlind Pëllumbi, pritshmëritë për të dy ekipet kombëtare janë të mëdha, duke synuar të paktën kalimin e fazës së grupeve. Në fakt, Kombëtarja e femrave u nderua në fillim të vitit me vendin e dytë në turneun e Luksemburgut.

I pyetur sesi e vlerësonte, me këtë ballafaqim ndërkombëtar, nivelin e volejbollit shqiptar, ai është përgjigjur: “Si fillim më duhet të theksoj se nuk ka më ekipe të dobëta dhe ekipe të forta. Në sport, kush gabon më pak, arrin më tej suksesin. Por më duhet të përmend një fakt se ekipet me të cilat ne u ndeshëm atje, në dukje ishin të dobëta, por në renditjen e Federatës Evropiane qëndrojnë shumë më lart se ne.”

“Këtu flas edhe për buxhete, – ka vijuar kreu i organizmit që qeveris rrjetën shqiptare, duke folur për mediat sportive.- Ato vajza kanë ndeshje dhe përvojë shumë më të madhe se ne. Ndaj na del për detyrë të bëjmë sa më tepër veprimtari ndërkombëtare, qofshin edhe në rajon, që ekipet të fitojnë edhe përvojën e nevojshme.” Por, a do të ketë grumbullime të përhershme apo si gjithmonë do t’u lihet prageliminatoreve?

“Një vit më parë, ne kemi krijuar një standard dhe do të preferoja të vazhdonim me të njëjtën mënyrë fazën përgatitore”, – është përgjigjur Pëllumbi, i cili ka folur edhe mbi strategjinë e FSHV-së, nëse baza e Kombëtareve do të jetë kampionati shqiptar apo më tepër do t’i jepet prioritet elementit jashtë. “Në sport flasin shifrat, – ka thënë ai. – Kush ka statistika dhe performancë më të mirë do të jetë pjesë e ekipit kombëtar.”

“Kështu mendoj unë, – ka vijuar presidenti i Federatës Shqiptare të Volejbollit, Erlind Pëllumbi. – Por përzgjedhja është e stafeve teknike, të cilët do të organizojnë fazën përgatitore dhe programin e duhur. Një plus për ne në Ligën e Evropës është që ndeshjet e para do të luhen në Tiranë te kompleksi i ri olimpik. Shpresojmë që ta përurojmë me këtë eveniment.”