ASNN – Rrjeti i Radio-Televizionit Shqiptar mbetet shtëpia e sportit dhe, krahas Kampionatit Botëror të Klubeve, transmetuesi publik do të sjellë për sportdashësit edhe emocionet e Kupës së Shqipërisë në volejboll për Meshkuj.
Më konkretisht, sonte, duke nisur nga ora 19:00, në kanalin e dytë të Televizionit Shqiptar dhe në kanalin RTSH Sport të platformës dixhitale, do të vijë takimi midis Studentit dhe Vllaznisë.
Kjo sfidë, e vlefshme për grupin A, është mjaft interesante, pasi Vllaznia e ka fituar takimin e parë, atë të zhvilluar mbrëmë, ndaj Farka Volejit dhe, një sukses sonte ndaj Studentit, do të nënkuptonte kualifikimin për në gjysmëfinale të Kupës së Shqipërisë.
Por edhe kampionët në fuqi e synojnë trofeun e dytë të rrjetës shqiptare të meshkujve, ndaj pritet një sfidë interesante. Ndërsa nesër, në ora 19:00, në kanalin e dytë të Televizionit Shqiptar dhe në kanalin RTSH Sport të platformës dixhitale, do të vijë takimi drejtpërdrejt midis Studentit dhe Farka Volejit.
