ASNN – Vllaznia në volejboll për meshkuj e ka nisur me humbje sezonin e ri të Kampionatit Kombëtar të Volejbollit për Meshkuj, teksa mbrëmë është mundur në fushën e vet 1-3 nga Studenti. Takimi i djeshëm ishte i pari për kuqeblutë, të cilët në javën e parë të kampionatit ishin pushim. Edhe pse përballja mes këtyre dy ekipeve gjithmonë ka dhuruar emocione dhe spektakël, falë rivalitetit të shfaqur në fushën e lojës, interesimi nga ana e tifozërisë shkodrane ishte në pikën “zero”.

Kuqeblutë ishin përgatitur për një start me fitore dhe në fakt, në një farë mënyre, u duk se do ta realizonin një gjë të tillë kur fituan setin e parë me rezultatin e ngushtë 26-24. Në ndryshim nga emocionet e setit të parë, që u shoqërua me një rivalitet shumë të madh, në të dytin miqtë nga Tirana, bëjnë diferencën, teksa fitojnë me diference në shifra, 19-25. Rivalitet, emocione dhe, hera-herës, nivel i lartë interpretimi nga të dy kampet përkatëse në fushën e lojë për setin e tretë.

Edhe pse Vllaznia është disa herë në kryesim të rezultatit, në momentet kyçe të mbylljes së setit gabon duke u mundur me dy pikë diferencë, 23-25. Atë që nuk e bëri në setin e tretë, Vllaznia kërkon ta bëjë në të katërtin me synim për ta çuar ndeshjen me set final. Nga ana tjetër, volejbollistët miq tregohen, të qetë dhe shumë të saktë në veprimet e tyre, si në pritjen e topit të parë, organizimin në pas, shutimin e fortë, por edhe bllokun rezultativ në rrjetë, pas pikës së 20-të krijojnë diferencën, duke e mbyllur setin e katërt 20-25 dhe krejt ndeshjen 3-1.

Vllaznia – Studenti              1-3

(26-24, 19-25, 23-25, 20-15)

Vllaznia: N. Qafarena, Çekini, A. Qafarena, Miloti, Jukni, K. Kola, R. Kola (L) / Gjoklaj, Taflaj, Lloshi, Drinazi, Preka. Trajner: M. Krroqi

Studenti: Pepa, Lundra, Sejati, Rama, Xhabrahimi, Baruti, Bërdufi (L) / Kupi, Muça, Kula, Çullhaj. Trajner: A. Sako

Gjyqtarë: E. Dusha, E. Zenullari (Tiranë)

Kampionati Kombëtar

i Volejbollit – Meshkuj

Java e dytë

(7-11 tetor 2016)

Të premten:

Tirana – Farka Volej            1-3

Të shtunën:

Skënderbeu – Partizani      0-3

Erzeni – Teuta                      3-0

Të martën:

Vllaznia – Studenti              1-3

Elbasani                                pushim

Renditja

Nr.       Skuadra         N.        F.         H.        Setet               Pikë

1. Erzeni                        2          2          0          6-0                  6
2. Partizani        2          2          0          6-1                  6
3. Studenti         2          2          0          6-1                  6
4. Farka Volej    2          2          0          6-2                  6
5. Vllaznia         1          0          1          1-3                  0
6. Elbasani        1          0          1          0-3                  0
7. Tirana             2          0          2          2-6                  0
8. Teuta              2          0          2          1-6                  0
9. Skënderbeu  2          0          2          0-6                  0