Studenti i Ylli Tomorit, kampione në fuqi e volejbollit shqiptar të djemve, nuk ka gjetur derman as në setin final për të çuar deri në fund përmbysjen e madhe që po i bënte disavantazhit 0-2 dje ndaj Vllaznisë në “Asllan Rusi”. E ajo që mbetet është fakti se Vllaznia e Artan Kalasë duket se është bërë si një “mace e zezë” për Studentin, ndërsa e ka mundur për herë të tretë radhazi për sezonin 2015-2016 në Tiranë, dy herë në kampionat dhe një herë në Kupën e Shqipërisë.

E përtej kësaj duket se po konfirmohet gjendja jo e mirë që kanë aktualisht, qoftë dhe fizikisht, kampionët. Shembull konkret është mosaktivizimi i Blerim Memisë për shkak të një dëmtimi në mes, që ka pësuar gjatë ndeshjes me Tiranën, të humbur javën e kaluar në Sallën Sportive “Fahrie Hoti”. Jo vetëm kaq, por mbështetur vetëm tek Troka duket se ka qenë shumë pak për Studentit, në kushtet kur pjesa tjetër e skuadrës me hope i është përgjigjur asaj që kërkonte Tomorri në të vërtetë.

Ndryshe ndodh tek Vllaznia, e cila ka luajtur mirë në dy setet e para. Më pas duket sikur ia ka varur ndeshjes për të shpërthyer në setin final. Për rrjedhojë një fitore e djeshme e Vllaznisë në Tiranë jo vetëm që ka konfirmuar kryesimin për kuqeblutë e Kalasë, por e ka futur në një farë krize Studentin, që duket se vetëm ndeshjet me Elbasanin dhe Skënderbeun në javën e ardhshme mund ta kthejnë përsëri në lojë dhe pretendente të fortë për titull. Sepse tani për tani nuk po gjen “dermanin” për të qenë dominuese në këtë garë për titull.

Bilanci i ndeshjeve Studenti-Vllaznia, 2015-2016

Studenti – Vllaznia  3-2      (Kupa e Federatës)

Studenti – Vllaznia  1-3      (Kampionat)

Studenti – Vllaznia  2-3      (Kupa e Shqipërisë, eliminatore)

Vllaznia – Studenti  2-3      (Kampionat)

Studenti – Vllaznia  2-3      (Kampionat)

Bilanci: Ndeshje 5, Fitore Studenti 2, Fitore Vllaznia 3, Setavarazhi 11-13

Kampionati Kombëtar

i Volejbollit – Meshkuj

Java e 18-të

(30 mars 2016)

Skënderbeu – Farka Volej             0-3

Studenti – Vllaznia                          2-3

Teuta – Tirana                                  3-2

Elbasani                                            pushim

Renditja

Nr.       Skuadra         N.        F.         H.        Setet               Pikë

1. Vllaznia         16        12          4        40-22              35
2. Tirana             16        10          6        37-20              33
3. Studenti         15        11          4        37-20              32
4. Farka Volej    15        10          5        34-20              29
5. Teuta              15          9          6        33-27              25
6. Skënderbeu  16          2        14          9-43                6
7. Elbasani        15          0        15          7-45                2