Ndeshja e parë gjysmëfinale midis Vllaznisë e Teuta është karakterizuar nga fillimi deri në fund nga shumë emocione, që i ka mbërthyer sportdashësit në Pallatin e Sportit “Qazim Dervishi” të Shkodrës për më shumë se dy orë e gjysmë. Një ndeshje që është karakterizuar nga një luftë e fortë sportive dhe ku, përpos setit të dytë që fitohet lehtësisht nga shkodranët, tek të gjithët të tjerët rivaliteti ka qenë në masën maksimale, aq sa në të parin dhe në të pestin janë dashur edhe pikët shtesë për të përcaktuar fituesin.

Dhe nëse kishte edhe cilësi, shoqëruar edhe me emocione të pafund, merita në këtë rast i takon skuadrës durrsake, e cila këtë herë ishte krejt tjetër. Teuta duhet thënë se përfitoi edhe nga një eufori e parakohshme e kuqebluve në radhët e të cilëve thuajse gjatë të gjithë javës më shumë flitej për finalen e madhe të ditës së dytë, ku parashikimi në sfond, pa filluar ndeshjet, ishte për një finale Vllaznia-Studenti. Përpos lojtarëve në fushën e lojës, një paragjykim i tillë ka qenë rëndom edhe në opinionin sportiv shkodran.

Kjo pati përfshirë edhe vetë specialistët dhe veteranët e volejbollit shkodran, një pjesë e të cilëve si Irfan Boriçi, Xhino Mjeda, Mark Krroqi etj, kanë qenë të pranishëm edhe në tribunën VIP të pallatit të sportit “Qazim Dervishi”. Vllaznia ishte fare pranë në disa mundësi radhazi për të marrë setin final dhe për të shkuar në finale, por gabimet, në disa raste edhe elementare, e ndëshkuan duke ia dhënë këtë mundësi ekipit durrsak që në fund të ndeshjes me trajnerin Leonard  Marangoni iu gëzuan me të drejtë fitores 3-2 dhe kualifikimit në finale.

Vllaznia – Teuta                                2-3

(24-26, 25-13, 25-21, 23-25, 17-19)

Vllaznia: Miloti, Rrashketa, N. Qafarena, Jukni, A. Qafarena, K. Kola, R. Kola (L) / Tatar, Çekini, Taflaj. Trajner: A. Kalaja

Teuta: A. Dashi, Kolea, Uruçi, J. Dashi, A. Vora, E. Vora, Moku, Nazifi (L). Trajner: L. Marangoni

Gjyqtarë: T. Zguri, E. Zenullari(Tiranë)

Kupa e Shqipërisë

Volejboll – Meshkuj

Kalendari i fazës finale:

(9-10 mars 2016)

Gjysmëfinalet:

Të mërkurën:

Vllaznia – Teuta                   2-3

Tirana – Studenti                 1-3

Të enjten:

Për vendet 3-4:

Vllaznia – Tirana                   ora 17:00

Finalja:

Teuta – Studenti                   ora 19:00

Kupa e Shqipërisë

Volejboll – Femra

Kalendari i fazës finale:

(11-12 mars 2016)

Të premten:

Barleti Volej – Vllaznia        ora 17:00

Tirana – Teuta                      ora 19:00

Të shtunën:

Për vendet 3-4                      ora 17:00

Për vendet 1-2                      ora 19:00