Zirat Bankasi Ankara jep leksion për Studentin. Në harkun kohor të një ore e shtatë minuta turqit kanë mbaruar punë në ndeshjen e parë të “Challenge Cup”, teksa kanë fituar pastër 3-0 dhe me diferenca të thella në pikët e seteve. Seti i parë ka nisur mirë për Studentin, që ka kryesuar deri në 3-0. Por gradualisht Zirat Bankasi Ankara merr frenat e lojës në dorë. Nilson e Rudevik, por dhe Savas në bllok, janë të papërballueshëm e situata përmbyset menjëherë.
4-8 në pushimin e parë teknik, 5-12, 6-16, 6-20 dhe në fund të setit të parë 9-25. Turqit nuk lëshojnë, madje janë të efektshëm dhe në shërbim. 2-8 në pushimin e parë teknik të setit të dytë. Më tej 4-12, 6-16, 8-19 dhe në fund 11-25. Munjoz vendos të ulë në stol Nilsonin, sepse nuk ka më nevojë për të parë dhe llojin e kundërshtarit. Është në lojë Van Dijk, por dhe Jilmaz e Zirat Bankasi Ankara mban të njëjtin ritëm. 0-5, 2-8, 8-16, 9-18 dhe në fund 14-25.
E kësisoj ka marrë fund historia e Studentit, që dihej ende pa u luajtur kjo ndeshje. Pikëshënuesi më i mirë i ndeshjes Rudevijk i Zirat Bankasi Ankarasë, me 12 pikë, ndjekur nga Nilsoni, po i Zirat Bankasi Ankarasë, dhe Xhabrahimi i Studentit, me 8 pikë secili. Në bllok, me 7 mure fituese ka dalë më i fortë Savas i Zirat Bankasi Ankarasë, kurse në shërbim, me 4 rezultative, janë Nilson dhe Jilmaz të Zirat Bankasi Ankarasë.
Në total, në 3 sete, Studenti ka shënuar 34 pikë prej të cilave 17 pikë vetë, kurse 17 pikë kanë ardhur nga gabimet e turqve. Në anën tjetër, në 3 sete, Zirat Bankasi Ankara ka realizuar 75 pikë prej të cilave 61 pikë vetë, kurse 14 pikë kanë ardhur nga gabimet e Studentit, që kështu nuk ka mundur t’i përballojë turqit.
Studenti – Zirat Bankasi Ankara 0-3
(9-25, 11-25, 14-25)
Studenti: Berdufi (L), Xhabrahimi, Kupi, Rama, Pepaj, Kula, Koçi / Çullhaj, Sejati, Deliu, Lundra, Baruti. Trajner: A. Sako
Zirat Bankasi Ankara: Kijak, Ruverdik, Gungor, Savas, Nilson, Sarin, Done (L) / Kiliç (L), Jilmaz, Enaiboko, Van Dijk. Trajner: F. Benitez Munjoz
Gjyqtarë: A. Milonakis (Greqi), M. Milinoviç (Kroaci)
Ndihmës: E. Dusha, Ç. Kojku, R. Mujo, E. Kurti (Shqipëri)
