Studenti, ashtu sikurse edhe mund të parashikohej, është bërë barrikadë për Tiranën kryesues të kampionatit të volejbollit të meshkujve, teksa dje në mbrëmje në sallën kryesore të Pallatit të Sportit “Asllan Rusi” e ka mundur pastër 3-0. Humbja e dytë për bardheblutë e Kojës, të cilët tashmë ndjejnë nga pas hapat e Vllaznisë, shkodranët janë vetëm një pikë larg tyre, por dhe të Studentit, që është ngjitur tashmë në vendin e tretë. Sikurse dhe të Teutës në vendin e katërt.

Në përgjithësi në këtë fitore, atje ku hera-herës skuadra e Tomorrit ka luajtur dhe ka marrë pikë pa shumë zhurmë, diferencën e kanë bërë të ardhurit në merkaton e dimrit. Që do të thotë se Troka, i cili ka qenë pikëshënuesi më i mirë i ndeshjes me 19 pikë, por dhe Vuldijev me 11 pikë, apo dhe Ivanov me 9 pikë kanë mbajtur peshën kryesore. Nuk mund të mohohet loja e veteranit Kasa, që për pikët e shënuara është baraz me të ardhurin e fundit në këtë merkato dimërore tek Studenti, 9, apo dhe ajo e Malajt.

Të gjithë bashkë kanë pasur dirigjimin e organizatorit Elton Tukseferi, i paepur dhe që vazhdon të sfidojë çdo kufij moshe në volejbollin e luajtur. Studenti mbi të gjitha sot funksionon me dy lojtarë në pozicionin tre, sepse veç Malajt, i cili ka pasur tre mure fituese, në të njëjtin pozicion po me kaq mure ka qenë edhe Ivanov, po pse jo dhe Vuldijev, që ka pasur katër mure fituese.

E parë, përtej përpjekjeve titanike të Tiranës për të mos u dorëzuar për asnjë moment, atje Rama me 13 pikë dhe Xhabrahimi me 11 pikë kanë përdorur të gjitha mënyrat për ta mbajtur skuadrën e Kojës në lojë, Studenti sot jo vetëm është një skuadër e kompletuar në të gjitha rolet, por është kthyer përsëri një kandidate e fortë për të marrë dhe për të mbrojtur titullin kampion, pse jo dhe Kupën e Shqipërisë. Tek bardheblutë Rama e Pepa me tre mure fituese kanë treguar se janë të aftë për ta bërë bllokun, por në fund Studenti ia ka dalë të jetë fitues, pastër 3-0.

Kampionati Kombëtar

i Volejbollit – Meshkuj

Java e 10-të

(20 shkurt 2016)

Studenti – Tirana                 3-0

Skënderbeu – Vllaznia       1-3

Elbasani – Farka Volej        2-3

Teuta                                      pushim

Renditja

Nr.       Skuadra         N.        F.         H.        Setet               Pikë

1. Tirana 9          7          2          22-8                21
2. Vllaznia 9          7          2          21-12              20
3. Studenti 8          6          2          20-10              17
4. Teuta 8          5          3          19-14              15
5. Farka Volej 8          4          4          16-14              12
6. Skënderbeu 9          1          8          5-24              3
7. Elbasani 9          0          9          6-27              2