Ndër të thirrurit e Kombëtares së volejbollit të meshkujve, e cila drejtohet nga Jani Melka dhe Artan Kalaja e që për drejtor teknik ka Dritan Çukon, në këtë grumbullim, atje ku spikasin dhe lojtarët legjionarë si Xhelati, Husaj dhe Shurdhi, është dhe shkodrani Anton Qafarena. Një lojtar që vjen për herë të parë në kombëtare, ndërsa në eksperiencën e tij ka pasur dhe dy ndeshje në Kupat e Evropës me Studentin përballë serbëve të Spartak Ljigut.

E Qafarena, që në fakt ka qenë edhe në 10-shen e sportistëve më të mirë të vitit 2015, ka treguar situatën në të cilën gjendet kampi kuqezi. I grumbulluar në Konvalishencën e Ministrisë së Brendshme në Durrës, kombëtarja e meshkujve bën nga dy seanca stërvitore në ditë. “Gjithçka, – thotë Qafarena, – është duke shkuar mirë. Madje shumë mirë do të thoja, ndërsa për mua është hera e parë që jam i grumbulluar në këtë kombëtare.

“Një stimul i madh për karrierën time dhe shpresoj të bëj maksimumin tim”, – shton ai. Jo vetëm kaq, por Qafarena ka vlerësuar dhe punën që është duke bërë Jani Melka me kuqezinjtë. E sipas tij ka konkurrencë shumë të madhe. “Sepse edhe lojtarët që kanë ardhur nga jashtë, me përvojën e tyre janë duke dhënë në grup një frymë të re. Unë do të thoja që trajneri Melka ka sjellë shumë të reja në ekip. Madje shumë metoda që i mungojnë volejbollit shqiptar.”

“Unë kam pesë vjet që luaj dhe ato metoda stërvitore në kombëtare nuk i kam parë asgjëkundi. Janë metoda dhe taktika të ndryshme, të cilat shpresojmë që t’i tregojmë në përballjet tona”. Duke mbetur tek kundërshtaret, Anton Qafarena shpreson që të kapet ndeshja me Maqedoninë. “Mendoj se është një kundërshtar i mundshëm, edhe pse do të luajmë në shtëpinë e tyre, – thotë ai. – Për Bullgarinë dhe Danimarkën nuk kemi asnjë informacion. Megjithatë shpresoj që të bëjmë më të mirën.”