Të mërkurën e të enjten në Shkodër, por dhe të premten e të shtunën në “Asllan Rusi”, volejbolli shqiptar luan për trofeun e dytë më të rëndësishëm të sezonit. Për herë të parë finalja për vendin 3-4. Volejbolli shqiptar do të jetë krejtësisht në qendër të vëmendjes këtë javë, teksa në katër ditët e fundit të kësaj jave do të luhet për trofeun e dytë më të rëndësishëm të sezonit 2015-2016.

Bëhet fjalë për Kupën e Shqipërisë, teksa për meshkuj Studenti dhe për femra Barleti Volej duhet të luftojnë për ta mbrojtur atë trofe, që sezonin e kaluar e kanë fituar pa probleme. Sa për kujtesë të lexuesve të Sport Ekspres, Studenti më 7 shkurt 2015 ka mundur Farka Volejin, 3-0, kurse Barleti Volej, më 1 shkurt 2015 pat mundur po 3-0 Tiranën. Tashmë situatat janë krejtësisht më ndryshe.

Sepse drejtuesit e rinj të Federatës Shqiptare të Volejbollit, pikërisht presidenti Erlind Pëllumbi dhe sekretari i përgjithshëm, Albens Vokopola, kanë menduar ta shtrijnë gjeografinë e zhvillimit të këtij aktiviteti. Nëse në fazën eleminatore është luajtur për femra në Durrës e në “Farie Hoti”, apo për meshkuj në Elbasan dhe “Asllan Rusi”, tashmë finalet nuk janë të përqendruara krejtësisht në kryeqytet.

Sigurisht që po të ishin si për meshkuj, ashtu dhe për femra në “Asllan Rusi” edhe vëmendja vizive e mediatike do të ishte e madhe. Për t’u evidentuar është fakti se për meshkuj janë kualifikuar Vllaznia, Studenti, Tirana e Teuta. Kurse për femra Tirana, Teuta, Barleti Volej dhe Vllaznia. Ajo që është shumë e rëndësishme është fakti se volejbolli shqiptar është gati për fazën finale të Kupës së Shqipërisë.

Kupa e Shqipërisë

Volejboll – Meshkuj

Kalendari i fazës finale:

(9-10 mars 2016)

Gjysmëfinalet:

Të mërkurën:

Vllaznia – Teuta                   ora 17:00

Tirana – Studenti                 ora 19:00

Të enjten:

Për vendet 3-4                      ora 17:00

Për vendet 1-2                      ora 19:00

Kupës së Shqipërisë

Volejboll – Femra

Kalendari i fazës finale:

(11-12 mars 2016)

Gjysmëfinalet:

Të premten

Barleti Volej – Vllaznia        ora 17:00

Tirana – Teuta                      ora 19:00

Të shtunën:

Për vendet 3-4                      ora 17:00

Për vendet 1-2                      ora 19:00