Drejtuesit e rinj të Federatës Shqiptare të Volejbollit, pikërisht presidenti Erlind Pëllumbi dhe sekretari i përgjithshëm, Albens Vokopola, kanë menduar ta shtrijnë gjeografinë e zhvillimit të Kupës së Shqipërisë. Nëse në fazën eleminatore është luajtur për femra në Durrës e në “Farie Hoti”, apo për meshkuj në Elbasan dhe “Asllan Rusi”, tashmë finalet nuk janë të përqendruara krejtësisht në kryeqytet.
Sigurisht që po të ishin si për meshkuj, ashtu dhe për femra në “Asllan Rusi” edhe vëmendja vizive e mediatike do të ishte e madhe. Megjithatë një zhvillim i finaleve të Kupës së Shqipërisë në volejboll për meshkuj në Shkodër, pikërisht në Pallatin e Sportit “Qazim Dervishi”, atje ku rrjeta shqiptare për më shumë se dy dekada nuk zhvillonte një veprimtari kaq të rëndësishme është një risi.
Sikurse është risi edhe zhvillimi i finales së vendit 3-4, që do të thotë se të katër ekipet gjysmëfinaliste janë në aktivitet dy ditë dhe jo një ditë, atje ku humbësit mund të mendonin sa më shpejt për t’u kthyer në shtëpi. Për t’u evidentuar është fakti se për meshkuj janë kualifikuar Vllaznia, Studenti, Tirana e Teuta. Kurse për femra Tirana, Teuta, Barleti Volej dhe Vllaznia.
Kësisoj Studenti për meshkuj dhe Barleti Volej për femra, dy ekipe që janë të vetme në këtë Kupë Shqipërie, sepse Tirana, Teuta dhe Vllaznia janë me të dy skuadrat e kualifikuar në finale. Pra si për meshkuj, ashtu dhe për femra. Sidoqoftë, ajo që është shumë e rëndësishme është fakti se volejbolli shqiptar është gati për fazën finale të Kupës së Shqipërisë, për meshkuj në Shkodër e për femra në Tiranë.
Kupa e Shqipërisë
Volejboll – Meshkuj
Kalendari i fazës finale:
(9-10 mars 2016)
Gjysmëfinalet:
Të mërkurën:
Vllaznia – Teuta ora 17:00
Tirana – Studenti ora 19:00
Të enjten:
Për vendet 3-4 ora 17:00
Për vendet 1-2 ora 19:00
Kupës së Shqipërisë
Volejboll – Femra
Kalendari i fazës finale:
(11-12 mars 2016)
Gjysmëfinalet:
Të premten:
Barleti Volej – Vllaznia ora 17:00
Tirana – Teuta ora 19:00
Të shtunën:
Për vendet 3-4 ora 17:00
Për vendet 1-2 ora 19:00
