Zhgënjen Studenti, që është fituese në fuqi e këtij trofeu, e jo vetëm kaq, por dhe kampione dhe fituese e Kupës së Shqipërisë. Në gjysmëfinalen e parë, Sako është privuar dje nga Çullhaji, që ka pasur probleme fizike, ndërsa Xhabrahimi për të mbajtur fitues Studentin ka qenë shumë pak. Sidomos në kushtet kur Lundra, Rama, Pepa, Baruti, e më pas dhe Kula e Sejati kanë hyrë me vonesë në lojë.

Ndërsa i riu Kupi, pa një organizator të dytë në skuadër, duket se do të përballojë një sezon me stres për një Student që kërkon të tjera gjëra dhe jo thjesht të jetë në fushë. Ndërkohë Farka Volej, nën dirigjimin e Deliut, shpërthen fuqishëm jo vetëm me Koçin e Qepën, por dhe Metanin e Mimanin, sidomos dhe me Bajramin e, për rrjedhojë, ia del të jetë fituese.

Sigurisht që ka dhe ngërçe, sidomos në setin e parë kur është në epërsi 20-23 e pas dy barazimeve arrin të fitojë në pikët shtesë 25-27. Është më e lirshme në setin e dytë që e ka fituar 20-25. E po në pikët shtesë Studenti ka fituar setin e tretë 32-30, por kjo nuk e përmbys situatën, sepse Farka Voleji, që tashmë e kishte hapur “shtegun” e fitores, ka marrë dhe setin e katërt, 22-25 dhe krejt ndeshjen 3-1.

Pikëshënuesi më i mirë i ndeshjes Redi Koçi i Farka Volejit me 27 pikë i pasuar nga Xhabrahimi i Studentit me 26 pikë, si dhe Qepa i Farka Volejit me 20 pikë. Në bllok ka dalë fitues Deliu dhe Koçi, me nga 4 mure fituese, kurse në shërbim Deliu i Farka Volejit me 3 rezultative. Në total, në 4 sete, Studenti ka shënuar 99 pikë prej të cilave 69 pikë vetë, kurse 30 pikë kanë ardhur nga gabimet e Farka Volejit.

Në anën tjetër Farka Voleji, në 4 sete ka shënuar 107 pikë prej të cilave 90 pikë vetë, kurse 17 pikë kanë ardhur nga gabimet e Studentit, që edhe pse ka gabuar më pak përsëri s’ia ka dalë të jetë fitues ndaj Farkës. E kjo duhet të jetë një shkundje për skuadrën e Sakos, për një tjetër paraqitje në kampionat, që në ndeshjen e javës së parë ndaj Skënderbeut

Studenti – Farka Volej         1-3

(25-27, 20-25, 32-30, 22-25)

Studenti: A. Lundra, Rama, Xhabrahimi, Baruti, Pepa, Kupi, Bërdufi (L) / Sejati, Muça, Kula. Trajner: A. Sako

Farka Volej: Deliu, Koçi, Qepa, Metani, Mimani, Vllaçaj (L), Bajrami / Xhajkone. Trajner: D. Bardhi

Gjyqtarë: Ko. Gjoka, E. Zenullari (Tiranë)

Ndihmës: A. Brojka, A. Nurja (Tiranë)

Kupa e Federatës Shqiptare të Volejbollit

Kalendari i Meshkujve:

Gjysmëfinalet:

24 shtator 2016:

Studenti – Farka Volej                     1-3

(25-27, 20-25, 32-30, 22-25)

Tirana – Vllaznia                               3-2

(23-25, 25-20, 15-25, 25-19, 15-13)

Finalja:

25 shtator 2016:

Farka Volej – Tirana             ora 19:00