ASNN – Tirana e Adrian Gorenxës dje ka qenë në një ndeshje stërvitore me Elbasanin, e cila dukej se kishte ardhur si për shëtitje në kryeqytetin shqiptar. Fakti që trajneria Garunja nuk ka marrë asnjë pushim, përtej atyre teknik, ndërsa Tirana ka qenë gjithnjë në udhëheqje të rezultati tregon se Elbasani ka qenë i dorëzuar ende pa filluar lojë. Për bardheblutë dje kanë munguar Shkurti, Tuci dhe Lasku për të cilat duhet pranuar se skuadra nuk ka pasur nevojë.
Krahas Bllokut, Nezajt, Hoxhës, Pirrës e Sejfullait, në lojë kanë qenë motrat Meta, Agolli, Llaka. Përfundimet e seteve nuk kanë nevojë për koment, sepse janë në shifrat 25-6, 25-6, 25-11 dhe thuajse brenda një ore Tirana ka fituar pastër 3-0. Pikëshënuesja më e mirë e ndeshjes Nezaj me 18 pikë e ndjekur nga Agolli me 13 pikë. Në bllok ka dalë fituese Hoxha e Tiranës dhe Shadini i Elbasanit me 1 mur fituese.
Kurse në shërbim, atje ku Tirana ka marrë një shumicë pikësh, janë fituese Hoxha me 4 të sakta, pasuar nga Pirra me tre të sakta, si dhe Agolli e Nezaj me dy të sakta. Në total në tre sete Tirana shënoi 75 pikë prej të cilave 67 pikë vetë, kurse 8 kanë ardhur nga gabimet e Elbasanit. Në krahun tjetër Elbasani në tre sete realizoi 23 pikë prej të cilave 17 pikë vetë, kurse gjashtë pikë kanë ardhur nga gabimet e bardhebluve. Në total një ndeshje pa pikë shije, sepse Tirana luajti pa kundërshtar.
Tirana – Elbasani 3-0
(25-6, 25-6, 25-11)
Tirana: E. Meta, Sejfullai (L), Hoxha, Agolli, Pirra, Blloku, Nezaj / R. Meta, Llaka. Trajner: A. Gorenxa
Elbasani: Kokuja, Gjeli (L), Garunja, Faqolli, Shadini, Kulla, Zhorda / Beshiri, Cërriku. Trajnere: R. Garunja
Gjyqtarë: K. Husi, E. Preka (Tiranë)
