ASNN – Mirdita në volejboll për femra ka korrur një sukses të rëndësishëm ditën e sotme, pasi mundi në gjysmëfinalen e Kupës së Shqipërisë skuadrën e Tiranës, me rezultatin e pastër 3-0, në një duel të dominuar nga fillimi në fund dhe ku nuk u vu aspak në diskutim kualifikimi nga skuadra e Rrëshenit. Seti i parë përfundoi me shifrat 25-20, seti i vetëm ku Tirana arriti të rivalizojë deri-diku. Ishte një dominim i Mirditës në aspektin tekniko-taktik, diktuar nga niveli i lojtareve por edhe angazhimi i grupit për të marrë maksimumin.

Në setin e dytë Tirana u përpoq të vinte në fillim diktatin e saj dhe të imponohej në ritëm, por e pati të pamundur. Në këtë sport duhet përgatitje e fortë dhe kualitet, ndryshe dështon. Mirdita i pati me shumicë këto element në përballjen me vajzat bardheblu dhe për këtë arsye arriti të fitojë edhe setin e dytë me shifrat 25-19. Seti i tretë ishte sa për statistikë, pasi dominimi i vajzave nga Rrësheni erdhi në rritje dhe në fund fitorja e tyre me shifrat 25-12 tregon qartë jo vetëm dominimin, por edhe mbylljen e hesapeve në favor të ekipit nga Rrësheni.

Ekip i cili kapi finale e madhe të Kupës së Shqipërisë, duel që do ta luajë përballë Partizanit ose Barleti Volejit të dielën më 3 mars, pikërisht në kryeqytet. Kjo finale pritet me mjaft interes, jo vetëm pse në garë është trofeu i parë sezonal, por edhe se fituesja e këtij dueli dhe paraqitja që do të bëjnë skuadrat do të tregojnë se cila prej tyre është favorite për titullin “kampion” të këtij sezoni. Ndërkohë, të shtunën do të luhen dy ndeshjet gjysmëfinale për meshkuj në Kupën e Shqipërisë: Partizani-Tirana (ora 17:00) dhe Erzeni-Vllaznia (ora 19:00).

Kupa e Shqipërisë

Volejboll – Femra

Gjysmëfinalet

1 mars 2019:

Mirdita – Tirana                     3-0

(25-20, 25-19, 25-12)

Barleti Volej – Partizani       2-3

(11-25, 25-21, 18-25, 25-21, 9-15)

Finalja

Të dielën, 3 mars 2019:

Partizani – Mirdita                 (17:00)