ASNN – Skënderbeu në volejboll për femra nuk arrin të mposhtë as Lushnjën në Pallatin e sportit “Tamara Nikolla” të Korçës. Mesditën e djeshme pritej që korçaret e rrjetës të ktheheshin te fitorja, por nuk kanë arritur ta bëjnë realitet një gjë të tillë, pasi Lushnja ka bërë surprizën teksa ka fituar 3-1. Pritej një ndeshje me rivalitet dhe e fortë, por Skënderbeu dje ka qenë në ditën e vet më të “errët” dhe vetëm në setin e tretë u kujtua në pikët e fundit për të bërë skuadrën e vërtetë.

Në 3 setet e tjera mikeshat nga Lushnja, me përvojën e disa lojtareve, kanë treguar se dinë të fitojnë edhe në fushë të huaj. Seti i parë nis mirë për Skënderbeun që kryeson 7-4, ndërkohë që mikeshat shënojnë pesë pikë radhazi dhe çojnë shifrat në 7-9. Më pas loja barazohet në rezultatin 16-16 dhe Lushnja shënon 7 pikë të tjera radhazi duke çuar shifrat në 16-23 dhe e mbyll këtë set 20-25. Në setin e dytë pritej që Skënderbeu të bënte kthesën, por mikeshat e nisin 0-5 qysh në nisje.

Më pas kjo diferencë ruhet edhe në rezultatin 5-10. Shifrat thellohen 8-17 dhe në fund 12-25. Seti i tretë nis sërish 0-4 për Lushnjën, ndërkohë që rezultati barazohet në 10-10 dhe 15-15. Në këtë moment volejbollistja mike me përvojë Lluko dëmtohet në gju dhe detyrohet të lerë parketin pas disa minutash ndërprerjeje. E mikeshat, të cilat e kanë mendjen te shoqja e tyre, “harrojnë” lojën. Skënderbeu përfiton nga ky moment dhe çon rezultatin në 24-19.

E kur duhej një pikë, Lushnja afrohet në 24-23. Por vetëm kaq, 25-23 për Skënderbeun.  Pritej që seti i katërt të ishte interesant, por që Lushnja mbyll historinë pasi komandon nga pika e parë deri te e fundit dhe fiton setin e tretë 16-25 dhe krejt ndeshjen 1-3.

Skënderbeu – Lushnja        1-3

(20-25, 12-25, 25-23, 16-25)

Skënderbeu: Dallas, Mujo, Demiraj, Shahu, Grabocka, Beshiri, Busho (L) / Nastas, Jatagani, Xhevat, Hasaj. Trajnere: T. Marash

Lushnja: J. Gjermeni, E. Gjermeni, Xhyliu, Zhupa, Sema, Allkanjari, Gjika (L) / Llupo, Xhogu, Kuqi, B. Gjermeni. Trajnere: A. Meta

Gjyqtarë: E. Zenullari, A. Shehu (Tiranë)

Kampionati Kombëtar

i Volejbollit – Femra

Grupi A1

Java e 12-të

(17-18 mars 2017)

Të premten:

Vllaznia – Elbasani             3-1

Të shtunën:

Skënderbeu – Lushnja       1-3

Teuta – Barleti Volej            2-3

Tirana – Partizani                2-3

Renditja

Nr.       Skuadra         N.        F.         H.        Setet               Pikë

1. Barleti Volej   12        12          0        36-6                34
2. Teuta              12          9          3        32-13              28
3. Partizani        12          9          3        30-14              27
4. Tirana             12          6          6        24-19              20
5. Vllaznia         12          6          6        20-24              16
6. Lushnja         12          4          8        15-27              11
7. Skënderbeu  12          2        10        11-31                8
8. Elbasani        12          0        12          1-36                0