ASNN – Fatbardha Picaku është integruar mirë tashmë në kombëtaren e volejbollit të femrave, e cila është duke u përgatitur për fazën finale të Ligës së Argjendtë të Evropës, që do të luhet më 16 dhe 17 qershor në Nykëping të Suedisë. Pas problemit shëndetësor që pati në fundin e sezonit, Picaku ka luajtur ndaj Gjeorgjisë, ndërsa e ndjen veten mirë në kombëtaren kuqezi.
Ajo madje e krahason kombëtaren me Dinamon e dikurshme të Kreshnik Tartarit, që arriti në katër më të mirat e Evropës më 1990. Shpreson shumë për trofe në Ligën e Argjendtë të Evropës, E nuk zbulon asgjë për skuadrën e saj të ardhshme në intervistën e saj për RTSH Sport, që AlbanianSport.com po e sjell të plotë.
– Fundi i kampionatit ju ka gjetur në vështirësi për shkak të një problemi shëndetësor. Tanimë në kombëtare si ndiheni?
– Është emocion i madh të jesh në ekipin kombëtar. Unë pata fatin e mirë që luajta përballë Gjeorgjisë, sepse Bici kishte një dëmtim të lehtë. Emocion i madh. Jemi duke u stërvitur dy herë në ditë, trajnerët janë duke bërë më të mirën, ndërsa shpresojmë të vazhdojmë me këtë hap deri në fund
– Të shtunën në gjysmëfinale përballë Suedisë, sa është në gjendje kjo skuadër të vijë me trofe nga faza finale?
– Duhet të jemi të ndërgjegjshëm se tashmë skuadrat janë më të forta se sa i kishim në fazën kualifikuese. Unë besoj se gjithçka do të shkojë mirë, pse jo dhe të kthehemi me trofe, ndërsa jemi duke u stërvitur fort.
– Faza finale e Ligës së Evropës, Lojërat Mesdhetare “Tarragona 2018”, Eliminatoret e Kampionatit Evropian. Sa është në gjendje Kombëtarja t’i përballojë me sukses këto veprimtari?
– Si nga tifozët jashtë, por dhe këtu brenda, atmosfera është pozitive. Madje kanë nisur të na cilësojnë si Dinamo e dikurshme, ndërsa kështu shpresojmë të jetë. Pra që të jemi edhe ne si Dinamo, sepse nuk është pak të jesh në katër më të mirat e Evropës.
– Së fundi, sërish me Barletin Volejin, apo një destinacion të ri?
– Jam e përqendruar me kombëtaren dhe derisa të mbaroj misionin kuqezi nuk kam asgjë për të thënë për sezonin e ri…
