29 pikë me sulm janë shifrat rekord të kësaj lojtareje të talentuar, që dje ka marrë mbi shpatullar ekipin kuqezi për ta çuar në vendin e dytë. Erblina Bici me plotgojë mund të quhet “legjenda” e kombëtares së volejbollit të femrave, teksa e vetme ka mundur kundërshtarin e dytë më të fortë të grupit A të Ligës së Evropës, Bjellorusinë. E papërmbajtshme në sulmet e saj, ndërsa ka qenë efektive në të gjitha goditjet e veta si në pozicionet dy e katër, por dhe nga vija e dytë.
Një gjë ishte e sigurt, çdo sulm i Bicit ishte pikë e garantuar për ne, ndërsa Bjellorusia në katër sete vetëm dy herë ka mundur ta bllokojë, kurse një herë të vetme e kemi bllokuar ne, sepse në një moment vendimtar Marina e ka luajtur 3 herë topin me Bicin pa i dhënë mundësi konkretizimi. Që të kuptohet se si e ka mundur Bici vetëm Bjellorusinë janë shifrat. Sepse Bici ka shënuar me sulm po aq sa na ka falur ne Bjellorusia, teksa në totalin prej 97 pikësh të shënuara, 69 i kemi realizuar vetë.
Kurse 28 pikë kanë ardhur nga gabimet e tyre. Pra të barabarta me pikët e shënuara me sulm nga Bici. Në krahun tjetër, kur në total Bici shënon 32 pikë, sepse përveç 29 pikëve me sulm ka dhe dy shërbime të realizuara dhe një bllok me pikë, atëherë ka rikuperuar të gjitha ato çka ne i kemi falur Bjellorusisë. Sepse në 4 sete Bjellorusia ka shënuar 94 pikë prej të cilave 64 pikë vetë,
Kurse 30 pikë kanë ardhur nga gabimet tona. Pra “qari” dhe “qederi” kanë qenë pjesë e lojës së legjendës së kombëtares shqiptare Erblira Bici, që vetë ka shënuar, vetë ka gabuar, e në fund na ka dhuruar një fitore spektakolare, e cila tashmë e rendit Shqipërinë në vendin e dytë në grupin A të Ligës së Evropës duke shpresuar që kështu do të jemi dhe pas një jave në tokën ruse.
Bjellorusi – Shqipëri 1-3
(25-22, 22-25, 24-26, 23-25)
Bjellorusia: Malasai, Klimoviç, Serik, Kapko, Ionava, Kicka, Fedarinçuk (L) / Harelik, Paulava. Trajner: A. Anxhelo Verçesi
Shqipëria: Bici, Tuci, Matoshi, Marina, Arjola Prenga, Thaka, Sejfullai (L) / Ulaj, Sade. Trajner: A. Martiri
Gjyqtarë: V. Vasileiadis (Greqi), I. Vanji (Itali)
Ndihmës: R. Mujo, T. Zguri, E. Dusha, E. Papamihali (Tiranë)
