ASNN – Shqipëria e volejbollit të femrave tashmë mund të konsiderohet skuadër e “fushës së huaj”. Pasi ka fituar më 20 maj në Tbilisi 3-0 ndaj Gjeorgjisë vendëse, të njëjtën gjë e ka bërë dje në Ranana ndaj Izraelit. Një ndeshje që, edhe për shkak të kundërshtarit, i cili ka pasur dhe dëmtime si Marmen, është kthyer në një seancë stërvitore. Një orë e 9 minuta dhe Shqipëria ka mbaruar punë ndaj Izraelit.
E të paktën është kthyer optimizmi pas humbjes 3-0 ndaj Austrisë në sallën olimpike “Feti Borova”. Ajo që është e sigurt është se Gjeogjia dhe Izraeli, janë kundërshtare që vajzat kuqezi i vënë poshtë. E nëse vijohet kështu, teksa pjesën e parë të ndeshjeve të Ligës së Evropës i kemi përfunduar në vendin e dytë, atëherë pjesëmarrja në finale është një mundësi reale.
Nëse ndodh kështu do të jetë dhe një përgatitje më e mirë për Lojërat Mesdhetare. Me dy ndeshje në shtëpi, më 30 maj 2018 ndaj Izraelit dhe 6 qershor 2018 ndaj Gjeorgjisë, Shqipëria e volejbollit të femrave, pas tre vjetësh pjesëmarrje në Ligën e Evropës, mund të realizojë ëndrrën për të qenë në finale. Por që të jetë një skuadër e fortë, ndërsa deri më tani është skuadër e fushës së huaj, duhet që një sukses të tillë ta bëjë dhe më 2 qershor në Vjenë ndaj Austrisë. Megjithatë le të mbetemi tek suksesi i Izraelit.
Liga e Argjendtë e Evropës
Volejboll – Femra
Grupi B
Renditja
Nr. Skuadra N. F. H. Setet Pikë
- Austria 3 3 0 9-1 9
- Shqipëria 3 2 1 6-3 6
- Izraeli 3 1 2 4-7 3
- Gjeorgjia 3 0 3 1-9 0
