Barleti Volej ka bërë “trimëri” me të rejat e Partizanit, që dje nuk kanë shënuar më shumë se sa 14 pikë në tre sete të luajtura përballë kampioneve në fuqi dhe kryesuesve aktual të volejbollit shqiptar të femrave. Në mënyrë të habitshme, Tarja ka vendosur që të mos aktivizojë asnjë nga titullaret e tij, ndoshta në mënyrë ironike me atë që po bënte Barleti Volej, që dje ka mbajtur në fushë shtatëshen e zakonshme titullare dhe nuk ka bërë asnjë lëvizje.

Shifrat e seteve nuk kanë nevojë për shumë koment, sepse flasin vetë për cilësinë e prodhuar në këtë ndeshje. 25-3, 25-5, 25-6, ndërsa në fund një ndeshje që nuk la shije të mirë për atë që vendosën të bënin trajnerët për inat të njëri-tjetrit. Gjithsesi në shifra pikëshënuesja më e mirë e ndeshjes është Braho e Barleti Volejit me 11 pikë, pasuar nga Bici me 10 pikë dhe Thaka me 9 pikë. Në bllok ka dalë fituese Thaka e Barleti Volejit dhe Fetaj e Partizanit me një mur rezultativ.

Kurse në shërbim është dalluar Bici me 8 të sakta, pasuar nga Xheka me 5 dhe Braho me tre. Në total në 3 sete, Barleti Volej ka realizuar 75 pikë, prej të cilave 66 vetë, kurse 9 pikë kanë ardhur nga gabimet e Partizanit. Në krahun tjetër Partizani në tre sete ka shënuar 14 pikë prej të cilave 6 vetë dhe 8 pikë kanë ardhur nga gabimet e kampioneve. Pra në kuptimin e plotë të fjalës një ndeshje mediokër e kjo jo për faj të lojtareve, por të përzgjedhjes teknike, sidomos të atyre të Partizanit. Sepse duket sikur u tallën me ndeshjen e vlefshme për kampionat.

Barleti Volej – Partizani       3-0

(25-3, 25-5, 25-6)

Barleti Volej: Braho, Xhixha, Tuci, Xheka, Bici, Fagu (L) / Thaka. Trajner: H. Gurabardhi

Partizani: Kaçani, Shera (L), Balla, Fetaj, Goxhaj, E. Agolli / Xhaferraj, Agolli (L). Trajner: R. Tarja

Gjyqtarë: R. Kuka (Vlorë), N. Dervishhasani (Elbasan)

Kampionati Kombëtar

i Volejbollit – Femra

Grupi A1

Java e 10-të

(5 mars 2016)

Barleti Volej – Partizani      3-0

Elbasani – Skënderbeu      0-3

Vllaznia – Tirana                  0-3

Teuta – Flamurtari               3-0

Renditja

Nr.       Skuadra         N.        F.         H.        Setet               Pikë

1. Barleti Volej   10        10          0        30-1                30
2. Tirana             10          9          1        28-3                27
3. Skënderbeu  10          8          2        24-10              22
4. Partizani        10          5          5        15-19              15
5. Teuta              10          4          6        15-19              13
6. Vllaznia         10          3          7        12-21              10
7. Elbasani        10          1          9          5-27                3
8. Flamurtari      10          0        10          1-30                0