ASNN – Ndërkohë vëmendja e opinionit sportiv shqiptar ka qenë e mbërthyer te suksesi i jashtëzakonshëm i peshëngritësve shqiptarë në Botërorin e Kazakistanit, por edhe te dy ndeshjet e Kombëtares së futbollit me Francën dhe Italinë, një tjetër sportiste shqiptare ka korrur suksesin e radhës.
Sportistja shqiptare, Arjola Prenga, e cila militon në kampionatin norvegjez me kampionen në fuqi, Stod Volej, ka korrur një fitore bindëse, 3-0, në ndeshjen e parë të turit të dytë të veprimtarisë kontinentale të volejbollit të femrave, “Çellenxh Kap”, duke mposhtur skuadrën holandeze, Slajdreht Sport.
Në takimin e zhvilluar dje pasdite në Sallën Sportive “Stajnkjer-Hallen” të qytetit të Stajnkjerit, skuadra e 28-vjeçares, e mbështetur edhe nga 850 tifozët vendas, e ka mbyllur gjithçka brenda 70 minutash. Setin e parë, Stod Voleji e ka fituar me rezultatin 25-16, ndërsa atë të dytin, me shifrat 25-19.
Në setin e tretë, skuadra e Arjolës fiton 29-19, duke e marrë kështu gjithë takimin 3-0. Në fakt, ashtu sikundër theksojnë edhe mediat sportive norvegjeze, të cilat e veçojnë shqiptaren për lojën e saj me shpirt, fitorja e kampioneve të Norvegjisë, që janë gjithashtu kampione të Ligës Nordike, nuk u vu për asnjë çast në dyshim.
Ndeshja e kthimit midis holandezeve të Slajdreht Sportit dhe norvegjezeve të Stod Volejit do të luhet pas dy javës, më 26 nëntor, duke nisur nga ora 20:00. Pavarsisht fitores, volejbollistja shqiptare e Stod Volejit, ka kërkuar nga skuadra e saj që të ruajë përqendrimit, pasi misioni ende s’ka përfunduar.
“Ia dolëm, – shkruan 28-vjeçarja shqiptare në një postim në profilin e saj në rrjetin social “Facebook”. – Faleminderit të gjithë atyre që ishin atje për të mbështetur skuadrën tonë dhe u ndjemë kaq ngrohtë dhe kaq bukur. Ishte një ndeshje e mrekullueshme dhe shumë e rëndësishme për të gjithë ne.
“Por nuk ka përfunduar ende, – vijon Arjola. – Ndeshja e radhës, më 26 nëntor në Holandë. Ne kemi nevojë për tifozët tanë edhe atje.” Stod Volej është kampione në fuqi e Norvegjisë dhe aktualisht kryeson renditjen e kampionatit vendas, pas 3 fitoresh në po aq ndeshje të këtij fillimsezon.
