Me përkrahjen e anëtarit të Komitetit Ekzekutiv të Federatës Shqiptare të Volejbollit, Dashamir Brari, por dhe si pasojë e kundërshtimit të MAS e KOKSH, pritet që vendimi i asamblesë së datës 10 tetor të shfuqizohet për të mirën e cilësisë sportive.
“Transferimi (lëvizja) për të gjithë lojtarët meshkuj dhe femra të cilët nuk do të kenë kontratë apo aktmarrëveshje individuale me klubin/shoqatën sportive do të bëhet kundrejt shumës 200.000 (dyqind mijë) lekë për çdo sportist. Klubi apo shoqata që merr lojtarin apo lojtaren në këtë rast duhet t’i likujdojë klubit apo shoqatës me të cilën lojtari është aktivizuar në sezonin e fundit sportiv shumën prej 200.000 (dyqind mijë) lekë. Pa likuiduar shumën prej 200.000 (dyqind mijë) lekë lojtari/lojtarja nuk mund të pajisen me licencë për t’u aktivizuar.”
Ky është vendimi që ka marrë asambleja zgjedhore e Federatës Shqiptare të Volejbollit, e cila u zhvillua më 10 tetor. Një vendim, i cili favorizon rrethet, të cilat e kanë votuar më së shumti, por që ka gjetur kundërshtinë e të gjithëve. Në votim ka dalë 14-7 në favor të këtij varianti, por në fakt që nga drejtori i sporteve në Ministrinë e Arsimit dhe Sportit, Vladimir Gjonaj, e deri tek shefi i sportit elitar në këtë dikaster Arjan Konomi, apo dhe presidenti i KOKSH, Viron Bezhani, kanë qenë kundër.
Sepse kështu cënohet cilësia sportive, por më së shumti penalizohen një shumicë lojtarësh, të cilët janë dhe pjesë e kombëtares. Dhe nuk janë pak, por bëhet fjalë për Shkurtin, Sejfullain, Nezajn, Esmeralda Tucin, Marvina Tucin, Xhixhën, Xhekën, Harxhin etj, të cilat klubet ku kanë shkuar duhet të paguajnë 200.000 lekë të rinj për skuadrën ku kanë përfunduar 2014-2015.
Gjë që nuk është normale, në një kohë që nuk kërkohet më as klubi i origjinës, sepse në mungesë të “defterëve”, apo dokumenteve, e kanë të vështirë të gjejnë se ku dhe si e kanë nisur volejbollin këto vajza e djem. Ndaj të gjithë e kanë kundërshtuar. Për hir të së vërtetës asambleja e jashtëzakonshme e 5 shtatorit, atje ku kryesia së bashku me ish-presidentin Adrian Doçi, dha dorëheqjen, nuk e pati zgjidhur, siç la peng zgjidhjen e borxhit të volejbollit. Dhe të gjithë këto pasoja tashmë bien mbi Federatën e re të volejbollit.