ASNN – U duk si pasditja e përkryer, pasi, në mënyrë të pabesueshme, rivalët u frenuan, dhe Vllaznia kryesuese kishte të hënën një mundpsi të mirë për ta thelluar në 3 pikë largësinë me ndjekëset, por një gjë e tillë nuk ndodhi. Kuqeblutë e mbyllën në barazim pa gola takimin në shtëpia me Kukësin, mes shumë rasteve të humbura, midis të cilave, edhe një 11-metër nga ana e Imerit. “Në përgjithësi, jemi të gjallë, jemi aty treguam një qëndrim të mirë dhe krijuam shumë raste, më shumë se Kukësi”, – ka deklaruar trajneri Tomas Brdariç, duke analizuar përballjen me Kukësin.
“Ndeshja shkoi siç shkoi, por djemtë e mi bënë gjithçka për të fituar atë, – ka vijuar gjermani. – Duhet të ishim treguar më agresivë në rastet e krijuara. 11-metërshi? Hoxhaj ishte zgjedhur të godiste. Por Imeri mori topin dhe donte të shënonte, Hoxhaj u largua. Duhet t’i japim besim lojtarëve, në mënyrë që ata të marrin përgjegjësitë e tyre. Por, sot ishte një vendim i gabuar për të goditur nga ana e Imerit. Jemi në pozita shumë të mira, por në futboll është e nevojshme të kesh besim. Sot zgjodhëm të jemi kompaktë, patëm shumë raste në pjesën e parë.”
“Kampionati është i gjatë dhe duhet të përballesh me të gjithë kundërshtarët me besim, – ka këmbëngul ish-futbollisti i njohur i përfaqësueses gjermane. – Strategjia e sotme ishte e mirë mendoj, por nuk rezultoi efektive në fund. Tentuam ta kapim Kukësin edhe me kundërsulm, prandaj ia lejuam në disa momente qarkullimin e topit. Sulmi? Të gjithë sulmuesit kanë punuar mirë gjatë javës. Biseduam me të gjithë në lidhje me vendimet e marra. Në ditët e fundit vendosëm që Haris Dilaveri të mos e niste si titullar këtë ndeshje.”
“Ai e ka besimin tim, ka qenë i pafat me Teutën, por është një lojtar që e vlerësoj dhe do të rikthehet më i fortë. Është sulmues shumë i rëndësishëm. Ka nevojë të tregohemi pak të duruar me lojtarët”, – përfundoi trajneri i Vllaznisë, Tomas Brdariç.
