ASNN – Java e katërt e grupit A të Kategorisë së Parë të Kampionatit Kombëtar të Basketbollit për Femra, dhuroi një surprizë të madhe. Vllaznia e Shkodrës mposhti kampionen në fuqi të sezonit të kaluar, Flamurtarin, me rezultatin 76-62. Ishte një sukses i papritur për shkodranet, të cilat vinin në këtë ndeshje jo si favorite. Por koshi i këtij edicioni po tregohet i pashpirt për vlonjatet, të cilat pësojnë humbjen e dytë në këto katër javë të para të garës.

Vlonjatet duket se e kishin nënvlerësuar ndeshjen dhe shumicën e kohës ishin në luftë me nervat e tyre. Kuptohet, Flamurtari nuk e ka më petkun e viteve të shkuara dhe komandën e njëherësh tonin e cilësisë sportive po e japin skuadrat e tjera. Një rivalitet i fortë për titullin “kampion”. Kjo humbje ka sjellë rënien e Flamurtarit në renditje, duke qenë vetëm me 6 pikë, kurse Vllaznia ngjitet në vend të tretë me 7 pikë.

Ndërkohë, ndeshja tjetër e Grupit A, ajo ishte ajo ku SH.K.B.F. Tirana mposhti thellësisht dhe pa mëshirë Elbasanin me shifrat 116-63, pra me 53 pikë diferencë. Skuadra e trajnerit Erdal Borova është këtë edicion për titull dhe fakti se ka fituar të katër takimet e para të sezonit do të thotë shumë për vazhdimësinë. Shpesh ndeshja dukej si një seancë stërvitore e vajzave bardheblu, teksa kundërshtari ishte i pafuqishëm të reagonte.

E ndërsa SH.K.B.F Tirana vijon të mbajë kreun, Elbasani mbetet në vend të fundit me 4 humbje në katër ndeshje, pra me vetëm 4 pikë. Ndeshjet e basketbollit të femrave sot patën emocione dhe në Grupin B, ku Skënderbeu mposhti pa problem diletantet e Kamza Basketin me shifrat 80-42, duke u ngjitur në vend të dytë në renditje pas Apolonisë së Fierit. Kurse Kamza e femrave mbetet në vend të fundit në këtë grup.

Kampionati Kombëtar

i Basketbollit – Femra

Kategoria e Parë

Grupi A

Të premten:

Studenti – SH.B. Tirana                     57-86

Të shtunën:

Vllaznia – Flamurtari                                      76-62

SH.K.B.F. Tirana – Elbasani           116-63

Renditja:

Nr.       Skuadra                     N.        F.         H.        Psh-Pp           Pikë

1. SH.K.B.F. Tirana      4          4          0          366-248         8
2. SH.B.F. Tirana          4          3          1          317-243         7
3. Vllaznia                     4          3          1          260-245         7
4. Flamurtari                  4          2          2          281-263         6
5. Studenti                     4          0          4          216-312         4
6. Elbasani                    4          0          4          245-374         4