Nxjerrja jashtë loje e Daliut, shtatlartit të durrsakëve, apo dhe nervozizmi i Llazanit bëjnë që miqtë të jenë krejtësisht të mefshtë përballë vrullit të shkodranëve të Gjeçajt. Pallati i sportit “Qazim Dervishi” në Shkodër i është rikthyer sërishmi emocioneve të fazës finale të “play-off”-it për titullin “kampion” në basketboll për meshkuj.

Pas barazimit 1-1, që do të thotë me nga një fitore përkatëse të Vllaznisë në Shkodër dhe Teutës në Durrës, ballafaqimi i tretë i luajtur mbrëmë në pallatin e sportit “Qazim Dervishi” ka folur tërësisht për skuadrën kuqeblu. Eliminimi i gabimeve të shfaqura në takimin e dytë në “Ramazan Njala”, por edhe rikthimi në formacion i malazezit Nikola Xhokoviç kanë dhënë efektin e duhur në lojën e skuadrës kuqeblu.

Një ndeshje, e cila që nga fillimi deri në fund është dominuar tërësisht nga Vllaznia, aq sa nëse e themi ndryshe nuk bëjmë asnjë gabim, sepse e ka shpartalluar Teutën në të gjitha drejtimet. Pasi për hir të së vërtetës duhet pranuar se një gjë të tillë e ka përjetuar prej së afërmi një publik i tërë dhe së bashku me të edhe drejtuesit më të lartë të Federatës Shqiptare të Basketbollit.

Dje në “Qazim Dervishi” ishin të pranishëm Presidenti i Federatës Shqiptare të Basketbollit, Avni Ponari, dhe Sekretari i Përgjithshëm, Korab Llazani, por edhe një numër i madh specialistësh dhe veteranësh të basketbollit shkodran e më gjerë duke mos ngurruar ta pranojnë hapur dominimin absolut të kuqebluve.

Kampionati Kombëtar

i Basketbollit – Meshkuj

Faza e “Play-off”-it

për titullin “kampion”

Finalja:

21 maj 2016:

Vllaznia – Teuta                                64-60  (1-0)

(19-6, 13-20, 15-16, 17-18)

Pallati i Sportit “Qazim Dervishi”, Shkodër

25 maj 2016:

Teuta – Vllaznia                                89-76  (1-1)

(16-19, 18-18, 30-18, 25-21)

Pallati i Sportit “Ramazan Njala”, Durrës

28 maj 2016:

Vllaznia – Teuta                    84-46  (2-1)

(21-14, 17-12, 22-8, 24-12)

Pallati i Sportit “Qazim Dervishi”, Shkodër

1 qershor 2016:

(nëse është e nevojshme)

Teuta – Vllaznia                               ora 19:00

Pallati i Sportit “Ramazan Njala”, Durrës

4 qershor 2016:

(nëse është e nevojshme)

Vllaznia – Teuta                               ora 19:00

Pallati i Sportit “Qazim Dervishi”, Shkodër