ASNN – Tashmë është zyrtare, pasi Vllaznia ka shkarkuar Baldo Rainerin dhe drejtimin e ekipit e merr Luan Zmijani. Ky lajm është konfirmuar nga faqja zyrtare e klubit shkodran në “Facebook”, e cila njofton se duke nisur nga sot, italiani nuk do të jetë më në krye të skuadrës kuqeblu. Përflitej prej ditësh për një largim të mundshëm të Rainerit por zyrtarizimi ka ardhur vetëm sot.

Sikundër e kishte bërë të ditur edhe më parë, trajneri italiano-zviceran nuk ka pranuar të largohet me dëshirën e tij nga drejtimi i ekipit edhe pse nuk po arrinte dot ta nxirrte skuadrën nga ngërçi i rezultateve negative, por ka pritur që drejtuesit të marrin masa ndaj tij. Së bashku me Rainerin, klubi ka ndërprerë kontratat edhe me 2 ndihmësit e tij, Daniele Nervi dhe Sabino Oliva.

Me largimin e Rainerit, klubi ka gjetur edhe pasuesin e tij. Në krye të stolit kuqeblu do të jetë trajneri aktual i skuadrës së Nën-19-vjeçarëve të Vllaznisë, Luan Zmijani ndërsa trajner i portierëve do jetë Avenir Dani. Prezantimi i stafit te ri është bërë para skuadrës sot në orën 17.00 dhe prova e parë e Zmijanit të ri do të jetë vizita e vështirë e të mërkurës në Laç, për t’u ndeshur me skuadrën vendase.