Blerjet e reja që iu shtuan skuadrës kuqeblu gjatë ditëve të fundit, përveç faktit se kanë forcuar skuadrën, kanë rritur në mënyrë të ndjeshme edhe moralin dhe entuziazmin në mjedisin futbolldashës shkodran. Deklarata e një dite më parë nga mesfushori kosovar Ylli Hoxha, që në Shkodër ka ardhur me synim për të kapur Evropën, ka dhënë efektin e menjëhershëm në opinionin sportiv të qytetit dhe më konkretisht në radhët e tifozerisë kuqeblu, që prej ditësh ka qenë tejet e interesuar për Vllazninë e sezonit të ri futbollistik.

Për vetë problematikat që po kalonte skuadra, por edhe klubi në gjetjen e lojtarëve të duhur në merkaton verore, ndërsa në Shkodër kanë ardhur një tufë lojtarësh, kryesisht të huaj, gjendja nuk dukej optimiste. Sepse asnjëri prej tyre nuk e kaloi provën në publik dhe u krijua përshtypja se edhe për këtë sezon futbollistik do të kishim një Vllazni për mbijetese. Një shqetësim të tillë nuk nguroi ta përcjellë dy ditë më parë edhe ish-futbollisti shkodran, Vioresin Sinani.

Ky i fundit, në cilësinë e kreut të komisionit të sportit pranë Këshillit Bashkiak, në mbledhjen e këtij Këshilli vuri në dukje shqetësimin e ligjshëm që kanë qytetarët shkodranë në lidhje me këtë temë. Por nuk vonoi shumë dhe nga kampi kuqeblu ka ardhur menjëherë reagimi, jo me fjalë por me vepra kur vetëm pas pak orësh zyra e shtypit bëri të ditur firmosjen me dy blerjet më të fundit, dyshen e njohur Yll Hoxha-Ditmar Bicaj.

Blerje që duket se sollën me vete edhe ndryshimin e objektivave për skuadrën kuqeblu. Kjo duket qartë në deklaratat e tyre të para zyrtare si futbollist të Vllaznisë, atje ku si Hoxha të martën, ashtu dhe Bicaj të mërkurën, të dy shënjestrojnë objektivin Evropë. Madje për lezhjanin Bicajn, krahas sigurimit të pjesëmarrjes në Kupat e Evropës, ka oreks për të fituar edhe trofeun e Kupës së Shqipërisë