Pas një pauze gati trejavore, Kampionati Kombëtar i Të Rinjve është kthyer në parket. Por duket se gjendja nuk ka ndryshuar, ndërsa rezultatet e thella, të përmasave deri në shkatërrim të kundërshtarit, kanë shoqëruar këtë kampionat. Kështu ka ndodhur në Shkodër, atje ku Vllaznia ka fituar 133-18 me Mjeshtërinë Sportive Durrës, që do të thotë me 115 pikë diferencë. Rezultat që do të jetë e vështirë të gjendet në historikun e basketbollit shqiptar, ndoshta në ato vitet e para të zhvillimit të këtij sporti.

E kjo tregon se Vllaznia s’paska pasur kundërshtar, ndërsa Mjeshtëria Sportive Durrës vazhdon të vërtetojë se nuk ka lidhje me kampionatin e të rinjve dhe basketbollin e luajtur. Duke u ndalur në ndeshjet e tjera, Kamza Basket ka fituar me Marsin, kurse Ardhëria e Afrim Bilalit, duke e mundur me 45 pikë Superior Basket, ka vërtetuar që është një rivale e fortë për titull “kampion”. Madje trajneri Bilali, pas ndeshjes në faqen e tij në “Facebook”, do të theksonte: “Sot fituam ndeshjen e radhës ndaj një ekipi shumë të fortë si Superiori.”

“Dua të falënderoj të gjithë çunat e skuadrës, por dhe ato që na mbështeten në shkallët e Pallatit të Sportit, – ka vijuar ai. – Nuk më mbetet gjë tjetër veçse t’i uroj një vit të mbarë të gjithë skuadrës sime”. Ndërkohë në grupin tjetër, ndeshja më interesante ka qenë ajo mes Real Basket dhe Tiranës, atje ku bardheblutë e Mirde Janit e kanë fituar në sekondat e fundit vetëm me tre pikë diferencë.

Një fitore bindëse ka bërë dhe Virtus Tirana ndaj Partizanit, si dhe Apolonia ndaj Elbasanit. Dhe të tre ekipet kryesojnë me pikë të barabarta 13. Mirëpo ajo që shqetëson është fitoret me rezultatet e thella, 115 pikë diferencë, që tregon se vazhdon të mos ketë skuadra të një niveli të pranueshëm në kampionatet e moshave. E më tej cili do të jetë rezultati në ekipet kombëtare?

Kjo është pyetje që gjithnjë mbetet pa përgjigje për shkak të këtyre diferencave të jashtëzakonshme.

Kampionati Kombëtar

i Basketbollit – Të Rinjtë

Grupi A

Java e 8-të

(17-18 janar 2015)

Vllaznia – Mjeshtëria Sportive Durrës      133-18

Marsi Basket – Kamza Basket                   35-51

Superior Klima – Ardhmëria Basket         34-79

Teuta                                                              pushim

Renditja

Nr.       Skuadra                                 N.        F.         H.        Psh-Pp           Pikë

1. Ardhmëria                         7          7          0          579-251         14
2. Vllaznia                         7          5          2          552-276         12
3. Superior Basket             7          5          2          588-362         12
4. Kamza Basket             7          4          3          401-388         11
5. Marsi Basket 7          2          5          280-377         9
6. Teuta                         6          1          5          255-393         7
7. Mjeshtëria Sportive Durrës 7 0          7          182-710         7

Grupi B

Java e 8-të

(17-18 janar 2015)

Partizani – Virtus Tirana                 25-71

Real Basket – Tirana                       68-71

Elbasani – Apolonia                                    43-65

Skënderbeu                                      pushim

Renditja

Nr.       Skuadra         N.        F.         H.        Psh-Pp           Pikë

1. Tirana 7          6          1          471-335         13
2. Virtus Tirana 7 6          1          436-321         13
3. Apolonia 7          5          2          348-294         13
4. Elbasani 7          3          4          391-383         10
5. Real Basket 7          2          5          400-448         9
6. Skënderbeu 6 1          5          232-324         7
7. Partizani 7          0          7          221-394         7