ASNN – Në pritje të shkuarjes në periudhën përgatitore të Ulqinit, trajneri i kuqebluve e ka nisur punën me skuadrën me dy seanca stërvitore në ditë. Trajneri Cungu u ka bërë me dije futbollistëve që sot përsëri do të punohet me dy seanca stërvitore. Oraret nuk kanë ndryshuar, ndërsa do të jetë në 09:30 paradite dhe në ora 14:30 pasdite. E skuadra do të vijojë të stërvitet në tapetin e Fushës Sportive “Reshit Rusi”.

Dëbora që ka mbuluar gjithë malësitë e Shkodrës, si dhe temperaturat e ulëta, që kanë shoqëruar zonën veriore në përgjithësi, kanë dhënë efektin e vet. Një situatë e tillë ka shoqëruar edhe skuadrën kuqeblu gjatë përgatitjeve të djeshme. Trajneri Armando Cungu, me frikën e ndonjë vonese të mundshme, por pse jo edhe të asaj që mund të mos zhvillohet fare, ka preferuar që faza e vërtetë të fillojë që dje në Shkodër.

Kështu në pritje të një vendimi të mundshëm për zhvendosjen e skuadrës jashtë vendit, ku nga sa është bërë e ditur stacioni më i mundshëm do të jetë Ulqini, trajneri kuqeblu nuk ka humbur kohë dhe ai ka vënë në jetë zhvillimin e dy seancave stërvitore në ditë, pra, me ngarkesë të plotë. Nëse të mërkurën në program ka qenë vetëm një seancë stërvitore, dje skuadra ka punuar me dy të tilla.

Në atë ta paradites, të realizuar në orën 09:30, skuadra është parë të marrë thuajse tërësisht ngarkesa fizike. Në program kanë qenë vrapimet e gjata përreth fushës, për të vijuar më pas edhe me ushtrime atletike dhe aerobike, shoqëruar edhe me sprinte nga diagonalet e dy gjysmëfushave. E të gjitha këto janë pasuar me kalimin e pengesave, shoqëruar dhe me përdorimin e topit.