ASNN – Goga Basket është kampione e Shqipërisë në basketboll për meshkuj për sezonin 2018-2019. Në derbin durrsak ajo mundi Teutën 81-60 dhe e mbylli serinë e finaleve me shifrat 3-2.
Goga Basket domininoi gjatë gjithë takimit të 5-të, të luajtur në fushën e saj, në Arenën Sportive “Dhimitraq Goga” në Durrës, duke e fituar ndeshjen me shifrat e thella 81-60. Pjesa e parë u mbyll me epërsinë prej 4 pikësh të vendasve, 16-12.
Në të dytën, Teuta u impenjua seriozisht, duke fituar këtë 10-minutësh, 18-17, por Goga Basket e mbylli gjysmën e parë në favor të saj, 33-30. Pjesa e 3-të u mbyll me shifrat 26-18 në favor të skuadrës së trajnerit të ri, Melzin Lazimi, duke e çuar kështu epërsinë e Gogës në 59-48.
Ndërsa e katërta, që u fitua thellë, 22-12, bëri që ndeshja të mbyllej 81-60 dhe Goga Basket të ngrinte lart kupën e kampiones së Shqipërisë. RTSH sport e solli drejtërdrejt derbin durrsak.
Goga Basket është krijuar dy vjet më parë si një skuadër basketbolli për meshkuj. Ajo ka triumfuar në Kategorinë e Parë në debutimin e saj sezonin e shkuar, duke vijuar të dominojë gjatë gjithë sezonit aktual të Superligës.
