ASNN – Shtatlarti shqiptar, Redi Koçi, ka debutuar me 3 fitore dhe një humbje me skuadrën e tij të re në kampionatin e Finlandës. Përveç kësaj, edhe paraqitja personale e volejbollistit kuqezi ka qenë mbresëlënëse, duke qenë në të 3 takimet e fituara, pikëshënuesi i dytë më i mirë i skuadrës. Volejbollisti shqiptar, Redi Koçi vazhdon të bëjë një paraqitje të kënaqshme në kampionatin finlandez me skuadrën e Leka Volejit, duke ruajtur një mesatare prej 15 pikësh të realizuar për ndeshje në këto 4 javë të para të sezonit të ri.
Skuadra e shqiptarit ka korrur një fitore në 3 sete të shtunën, në ndeshjen e javës së 3-të ndaj Iskut, ku Koçi shënoi 15 pikë, ndërsa ka pësuar një humbje 24 orë më vonë në ndeshjen e javës së katërt, duke u mundur 0-3 në fushën e ETTA-së. Në këtë takim, Koçi shënoi 12 pikë, por, sipas volejbollistit kuqezi, ajo që ndikoi më tepër në fatin e kësaj ndeshjeje ishte gjykimi, sipas tij, tendencioz. Megjithatë, skuadra e sportistit 2 metër e 3 cm të gjatë mban vendin e dytë në renditje, me 9 pikë të grumbulluara pas 4 ndeshjesh, po aq sa ka edhe skuadra e VaLePasë, e cila ka luajtur një ndeshje më pak.
Kësisoj, ka nisur në një mënyrë të shkëlqyer aventura e Redi Koçit në kampionatin finlandez të volejbollit për meshkuj. 22-vjeçari, i cili në korrik nënshkroi një kontratë dhe në gusht u zhvendos në klubin finlandez të Leka Volejit, ka debutuar me 3 fitore dhe një humbje me skuadrën e tij të re në kampionatin e vendit nordik. Përveç kësaj, edhe paraqitja e tij personale ka qenë mbresëlënëse, duke qenë në të 3 takimet e fituara, pikëshënuesi i dytë më i mirë i skuadrës.
