ASNN – Ka qenë një javë e ngarkuar kjo për 3 titullarët e Kombëtares kuqezi të volejbollit për meshkuj, Redi Koçin, Anton Qafarenën dhe Ildi Deliun. Në kampionatin e Republikës Çeke, skuadra e Ustit, ku militon 23-vjeçari Koçi, ka pësuar fillimisht një humbje, por ka marrë edhe një fitore më pas, në dy takimet e zhvilluara përgjatë 10-ditëshit të fundit.
Skuadra e volejbollistit 2 m e 3 cm të lartë është mundur 1-3 përballë VK Lvi Pragës në takimin e vlefshëm për javën e 4-t, por ka vijuar të fitojë në shtëpi me të njëjtat shifra ndaj Bërnos dhe Koçi është përfshirë në formacionin e javës. Ndërkaq, volejbollisti tjetër i Kombëtares kuqezi, Anton Qafarena, ka shënuar 20 pikë në duelin e vlefshëm për javën e 3-të të Bundesligës gjermane.
Por as kjo nuk ka mjaftuar që skuadra e tij, Byhli, të shmangte humbjen në 3 sete përballë Fridrihshafenit. Kjo e fundit kryeson renditjen me pikë të plota, 9, ndërsa skuadra e 21-vjeçarit shkodran mban vendin e 9-të në kampionatin me 12 skuadra, por ka luajtur vetëm dy ndeshje. Ndërkohë, më e mbarë ka qenë kjo javë për pasuesin e Kombëtares kuqezi, Ildi Deliun.
Ai ka korrur fitoren e 4-t në po aq javë të këtij sezoni të kampionatit hungarez të volejbollit me skuadrën e Keshkmetit. Ekipi i 23-vjeçarit ndan vendin e parë të grupit B me Fino Kaposvarin, me të dyja rivalet që kanë nga 12 pikë dhe kanë lëshuar vetëm 1 set në këto 4 javë të para. Të dyja skuadrat përballen me njëra-tjetrën më 3 nëntor në fushën e ekipit të shqiptarit, në kuadër të javës së 5-të.
