ASNN – Sava Thaka ka bërë një paraqitje mjaft të kënaqshme në planin personal, në këtë sezon të nivelit më të lartë të kampionatit sllovak të volejbollit të femrave. Ajo është padyshim lojtarja më e spikatur e skuadrës së saj, duke qenë në parametra të qëndrueshëm në të gjitha aspektet. Kjo paraqitje, që sportistja synon ta ruajë, madje ta përmirësojë për pjesën e mbetur të sezonit, është një ogur i mirë edhe për Kombëtaren shqiptare të vajzave të rrjetës, që ka përpara një vit të ngjeshur në 2018-ën në arenën ndërkombëtare.
Ndonëse skuadra e saj, BK 97 Stova, nuk ka qenë në nivelin e dëshiruar sa u përket rezultateve të këtij sezoni të nivelit më të lartë të kampionatit sllovak të volejbollit të femrave, Sava Thaka ka bërë një paraqitje mjaft të kënaqshme në planin personal. Ajo është padyshim lojtarja më e spikatur e skuadrës së saj, duke qenë në parametra të qëndrueshëm në të gjitha aspektet e paraqitjes së saj. Qendra 1 m e 87 cm e gjatë është e para e skuadrës së saj, si përsa i përket shënimit të pikëve, si përsa i përket sulmit, ashtu edhe lojës në bllok.
Në këto 16 ndeshje të deritanishme me BK 97 Stovën në kampionat, volejbollistja e Kombëtares shqiptare të rrjetës së femrave ka realizuar 171 pikë, nga 1,111 që ka realizuar gjithsej skuadra e saj, me një mesatare prej 10.7 pikësh për ndeshje, afro 3 pikësh për set. Ajo ka edhe përqindjet më të mira të skuadrës së saj sa i përket lojës në sulm, si në efikasitetin, ashtu edhe në pozitivitetin në zhytje, ku ka një mesatare prej 4.5 zhytjesh për set.
Natyrisht, një nga pikat e saj më të forta, për vetë rolin që ajo ka në parket, është loja në bllok, ku ajo është sërish më e mira e skuadrës së saj. Madje, me 42 muret e suksesshme në bllok, 25-vjeçarja renditet e 3-ta në kampionatin sllovak të volejbollit të femrave. Kjo paraqitje, që sportistja synon ta ruajë, madje ta përmirësojë për pjesën e mbetur të sezonit, është një ogur i mirë edhe për Kombëtaren shqiptare të vajzave të rrjetës, që ka përpara një vit të ngjeshur në 2018-ën në arenën ndërkombëtare.
Përveç Kombëtares, statistikat e Sava Thakës janë një garanci për një ofertë edhe më të mirë për qendrën kuqezi në mbyllje të këtij sezoni.
