ASNN – 23-vjeçarja realizon 13 pikë në fitoren në 3 sete të Novarës në Serinë A1 të kampionatit italian. Vazhdon mjaft i kënaqshëm sezoni i parë i shqiptares Erblira Bici në nivelin më të lartë të volejbollit italian të femrave dhe, në takimin e javës së 19-të të Serisë A1, ajo ka qenë shënuesja më e mirë e skuadrës së saj, Igor Volej Novarës, në fitoren në 3 sete në fushën e Lardini Filotranos.
Në një takim ku pikët u shpërndanë gjerësisht, teksa dy nga shoqet e saj të skuadrës, Stufi dhe Kirikela, shënuan nga 9 pikë secila dhe dy të tjera, Seleste Plak dhe Mishelë Bartsh shënuan përkatësisht 11 dhe 10 pikë, Bici realizoi 13 pikë, duke qenë edhe realizuesja më e mirë e takimit, pasi shënuesja më e mirë e skuadrës kundërshtare kishte 11 pikë.
Nga këto 13 pikë, 23-vjeçarja e realizoi njërën direkt nga shërbimi, dy të tjera në bllok, ndërsa 10 pikë i realizoi në sulm. Kjo ishte një tjetër paraqitje e mirë e volejbollistes 1 m e 86 cm e lartë, e cila gjithashtu është shpallur edhe dy herë të tjera Lojtarja më e mirë e ndeshjes (MVP), ndërsa ka dhënë kontributin e saj edhe në pjesëmarrjen e skuadrës në Ligën e Kampioneve të Evropës.
Novara është në rrugë të mbarë edhe në veprimtarinë prestigjioze të rrjetës kontinentale të femrave, ku e ka siguruar edhe matematikisht kualifikimin, por pritet të sigurojë edhe kreun e renditjes së grupit. Në fillim të këtij muaji, skuadra e kapitenes kuqezi mbrojti me sukses edhe trofeun e Kupës së Italisë, në atë që ishte një arritje historike për volejbollisten shqiptare.
Skuadra e Bicit është në rrugë të mbarë edhe në kampionat, ku ndan kreun e renditjes me Imoko Volejin, skuadrën të cilën e mundi në 5 sete në finale të Kupës. Me pak fjalë, pas dy sezonesh të suksesshme në Serinë A2, ky sezon i sportistes shqiptar në Serinë A1 premton të jetë mjaft i suksesshëm, përtej faktit se ajo po e përballon mjaft mirë aktivizimin në një skuadër të mbushur me yje të volejbollit evropian dhe atij botëror, duke dhënë maksimumin sa herë i është dhënë mundësia.
