ASNN – Lë pas problemet me gjurin, ndihmon Busto Arsizion drejt fitores së 5-të. Volejbollistja Erblira Bici e ka kapërcyer shqetësimin në gju dhe në fundjavë është rikthyer të ndihmojë skuadrën e saj, Busto Arsizion, të kapërcejë humbjen e setit të parë dhe të përmbysë gjithçka në 3 setet e tjera, duke fituar me shifrat 3-1 në fushën e Bergamos. Diagonalistja shqiptare është aktivizuar në mesin e setit të dytë dhe ka vijuar të shënojë 13 pikë, duke qenë ndër 4 realizueset më të mira të të gjithë ndeshjes.
Megjithëse ka spikatur në miqësoret e parasezonit, një shqetësim në gju ka bërë që ajo të jetë e kufizuar në takimet e fillimit të nivelit më të lartë të kampionatit italian të volejbollit për femra, që njihet si Seria A1. Por tanimë duket se Erblira Bici e ka kapërcyer atë shqetësim dhe në fundjavë është rikthyer të ndihmojë skuadrën e saj, Busto Arsizion, të kapërcejë humbjen e setit të parë dhe të përmbysë gjithçka në 3 setet e tjera, duke fituar me shifrat 3-1 në fushën e Bergamos.
Në fakt, diagonalistja shqiptare është aktivizuar në mesin e setit të dytë dhe ka vijuar të shënojë 13 pikë, duke qenë ndër 4 realizueset më të mira të të gjithë ndeshjes. Ajo ka spikatur sidomos në setin e 3-të dhe të 4-t, duke e ndihmuar skuadrën e saj të marrë fitoren e 5-të në këto 7 javë të këtij sezoni dhe tanimë mban vendin e dytë të renditjes, me 16 pikë, 4 më pak se kampionia në fuqi, Imoko Koneljano, por një pikë më tepër se nënkampionia në fuqi e Italisë, Igor Novara.
Duhet kujtuar këtu se, me Novarën, Bici u shpall sezonin e shkuar kampione e Evropës për klubet, ndërsa këtë sezon është zhvendosur tek Busto Arsizio për më tepër hapësirë. “Ishte një ndeshje e ndërlikuar, por e zgjidhur mirë nga skuadra jonë dhe marrim me vete në shtëpi 3 pikë të rëndësishme”, – ka deklaruar kapitenia kuqezi pas fitores.
“Nuk e kemi nisur edhe aq mirë takimin, por ia kemi dalë të ndryshojmë gjithçka në këtë garë, sepse jemi një skuadër e vërtetë, jemi të gjitha të forta dhe dimë ta ndihmojmë njëra-tjetrën në çaste të vështira”, – ka theksuar ajo, duke vijuar: “Personalisht nuk e kam nisur mirë sezonin për shkak të një problemi fizik, por tanimë ndjehem mirë dhe synoj të jap më të mirën për skuadrën time”, – ka përfunduar volejbollistja kuqezi, Erblira Bici.
