ASNN – Përveç buxhetit, miratohet edhe Bordi Mbikëqyrës, Lici dhe Kadija flasin pas mbledhjes. Të premten është zhvilluar mbledhja e Këshillit Bashkiak të Shkodrës, që ka zhbllokuar më në fund ngërçin e Klubit të Futbollit “Vllaznia”. Kjo mbledhje ka miratuar buxhetin, që ka kapur vlerën e 130 milionë lekëve, por edhe ka miratuar Bordin e ri Mbikqyrës, organ ky që vitet e fundit nuk ka funksionuar.
Ndonëse në rendin e ditës së Këshillit Bashkiak të Shkodrës për KF Vllazninë përcaktoheshin 3 pika, “Projekt-vendim për zvogëlim të thjeshtuar të kapitalit aksionar”, “Projekt-vendim për miratimin e buxhetit të shoqërisë aksionare “Klubi i Futbollit Vllaznia sh.a” për vitin 2020”, “Projektim vendim për miratimin e pasqyrave financiare për vitin 2018 të shoqërisë aksionare “K.F. Vllaznia sh.a.”, mbledhja është hapur me një propozim jashtë rendit të dites për miratimin e Bordit të ri Mbikqyrës Vllaznia, pozicion ky që vitet e fundit nuk ka qënë në funksion.
Diskutime këto që kanë marrë më shumë se 90 minuta kohë, jo vetëm për rëndësinë e ekzistencës së këtij bordi, por edhe për emrat që duhet të bëheshin pjesë e këtij bordi. Ndërkohë, në vijim është kaluar në trajtimin e pikave të rendit të ditës ku me interes është ndjekur raporti i përcjellë nga ana e administratorit të Klubit të Futbollit Vllaznia, Suad Lici.
Duke folur pas mbledhjes, Lici ka dhënë edhe mendimin e tij lidhur me buxhetin, që ka kapur vlerën e 130 milionë lekëve të reja, të cilin e vlerëson si një vendim pozitiv. Për kreun e Këshillit Bashkiak të Shkodrës, Brisela Kadija, e cila në këtë rast ishte edhe drejtuesja e Asamblesë së Përgjithshme të KF Vllaznia, mbledhja në fjalë ishte e një përgjegjësie jo të vogël, pasi në një farë mënyre në opinionin publik shkodran dhe më gjërë këshilli dhe asambleja Vllaznia ishin të paragjykuar për nga përkatësia partiake.
Në mbyllje, Kadija në cilësinë e kryetares së Këshillit Bashkiak Shkodër ka edhe një mesazh për opinionin publik dhe tifozerinë shkodrane. Asambleja e përgjithshme e KF Vllaznia i ka mbyllur punimet e saj me atë që e hapi, propozimin për formimin e Bordit të ri Mbikëqyrës Vllaznia që me konsensus votimi për emrat e propozuar u la për në fund. Me votim të fshehte, nga 11 emrat e propozuar fitues dolën 5: Hysen Zmijani, Myzafer Bushi, Fatjon Nurja, Agron Okaj dhe Gledis Çeliku.
