ASNN – Ndërpritet me mirëkuptim kontrata me Ristevskin dhe Uendersonin, vjen Prendi dhe Hristov. Skuadra e Vllaznisë, e cila, ndryshe nga shumica e ekipeve të tjera të Kategorisë Superiore, që kanë “emigruar” në Turqi, ka zgjedhur Ohrin në Maqedoninë e Veriut për të zhvilluar atje fazën e saj përgatitore dimërore. Kjo fazë, që do të zgjasë 12 ditë, ka nisur pasditen e së mërkurës dhe do të mbyllet më datë 20 janar.
Shkodranët kanë hyrë tanimë në ngarkesë të plotë dhe stërvitja po zhvillohet me ngarkesë të plotë, me nga dy seanca në ditë, duke alternuar punën me topin dhe skemat në fushë, me ushtrimet e forcës në palestër. Sipas informacionit që përcjellin burimet pranë klubit kuqeble nga Ohri për RTSH Sport, i pranishëm në stërvitje të enjten pasdite ka qenë edhe futbollisti Kristi Prendi, i cili ka luajtur me Dinamon gjatë dy sezoneve të fundit dhe do të jetë për disa ditë në provë.
Ndërkaq, Vllaznia ka bërë të ditur se ka ndërprerë kontratën me një tjetër futbollist, i cili nuk ka qenë në planet e stafit teknik për gjysmën e dytë të sezonit. Bëhet fjalë për mbrojtësin Aleksandar Ristevski. Me të është arritur marrëveshja përkatëse e mbylljes së bashkëpunimit.Po kështu, më herët klubi shkodran ka bërë të ditur se edhe futbollisti brazilian, Uenderon da Silva Soares, nuk do të jetë më pjesë e skuadrës.
Edhe me të është rënë dakord që të ndërpritet me mirëkuptim kontrata e punës dhe në fund palët kanë shtrënguar duart me njëri- tjetrin. Në Ohër, Vllaznia ka planifikuar edhe dy miqësore dhe e para është me Pogradecin, me datë 11 janar, ndërsa me 14 janar do të luajë me ekipin vendas të Strugës, që merr pjesë në Superligën e Maqedonisë së Veriut. Dhe ditën e fundit, gjatë kthimit në Shqipëri, kuqeblutë do të luajnë miqësoren e fundit me Bylisin në Elbasan.
