ASNN – Mesfushori i Vllaznisë, i ftuar në Rubrikën Sportive në RTSH, analizon kryesuesit, vlerëson skuadrën. I ftuar në Rubrikën Sportive në Rrjetit të Radio-Televizionit Shqiptar, mesfushori Herald Marku theksoi se fitorja ndaj Kukësit nxorri në pah potencialin e skuadrës së Vllaznisë. Ai pohon se transformimi nga një ekip që luftonte për mbijetesë, tek një skuadër që synon titullin, ka qenë një përvojë e këndshme.
Një fitore me vlerë të dyfishtë e ka cilësuar futbollisti i Vllaznisë, Herald Marku, atë që kuqeblutë arritën të premten kundër Kukësit. “Fitorja me Kukësin na ka ndihmuar shumë psikologjikisht, – ka deklaruar ai. – Fituam përballë një kundërshtari të fortë. Jemi rritur pas çdo fitorja që kemi arritur”. Mesfushori theksoi se kjo fitore nxorri në pah edhe potencialin e skuadrës.
“Kishim dy mungesa, që po kalojnë një formë mjaft të mirë dhe na penguan disi, – ka pohuar ai. – Por edhe lojtarët e tjerë e bënë mirë detyrën e tyre. Pavarësisht fitoreve, duke mundur kundërshtarë direkt, dua të them se kemi akoma një rrugë të gjatë”. Vllaznia është e shkëputur 9 pikë në krye të renditjes, pas 14 javësh kampionat, por 24-vjeçari preferon të qëndrojë me këmbë në tokë sa u përket shpresave për titull.
Për futbollistin e lindur në Laç, loja e skuadrës e ka rritur edhe lojën e tij në planin personal. “Trajneri ka ndërtuar një mënyrë taktike shumë të strukturuar, – sqaron shtatlarti. – Unë personalisht jam më i lirë për të goditur portën, gjithashtu për të shërbyer edhe për shokët. Nuk e fsheh se jam i surprizuar po dhe i kënaqur me këtë që po bëjmë.”
“Jemi një grup i bashkuar, me lojtarë shumë të mirë, është krijuar një atmosferë shumë e mirë. Urojmë të vazhdojmë kështu”, shton Marku, i cili pohon se transformimi nga një ekip që luftonte për mbijeteës, tek një skuadër që synon titullin, ka qenë një përvojë e këndshme.
Në kuadër të javës së 15-të, Vllaznia është mysafire në Ballsh, për t’u ndeshur të mërkurën pasdreke me Bylisin. “Ndeshja me Bylisin? Është një fushë e vështirë, do të përballemi me një skuadër agresive. Por edhe ne do të jemi gati për të pretenduar një rezultat pozitiv”, – ka përfunduar futbollisti i Vllaznisë, Herald Marku, duke folur në Rubrikën Sportive në RTSH.
