ASNN – Kategoria Superiore e Kampionatit Kombëtar të Futbollit ka luajtur të dielën pasdreke dy takime të vlefshme për javën e 21-të, duke dhuruar vetëm një gol në 180 minutat e zhvilluara në Kamëz dhe Gjirokastër. Në Kamëz, Tirana ka shtangur Kukësin me një gol të vetëm, të shënuar në minutat e fundit të kohës së rregullt nga Albi Doka.

Interesant është fakti se, me këtë fitore, Tirana ka ndihmuar rivalen e saj të përjteshme Partizanin, pasi tanimë Kukësi mbetet 6 plot 8 pikë prapa të kuqve kryesues. Por, më tepër se aq, bardheblutë kanë korrur një fitore karakteri që gjithashtu i largon ata edhe më tepër nga zona e ftohtë e rënies nga Kategoria Superiore.

Në takimin tjetër të pasdrekes, Luftëtari dhe Flamurtari ndanë nga një pikë në barazimin e bardhë midis tyre. Partizani, i cili mposhti të shtunën Kastriotin me rezultatin 2-0, kryeson tanimë në kuotën e 46 pikëve, i ndjekur nga Kukësi me 38. Në krahun tjetër të renditjes, me pikën e marrë në Gjirokastër, Flamurtari ngjitet në kuotën e 30 pikë.

Skuadra vlonjate mbetet në vendin e 6-të, i ndjekur nga Tirana, me 24 dhe Luftëtari, me 21 pikë. Takimi i fundit i javës së 21-të është ai i së hënës në mbrëmje, ku Skënderbeu do të presë në Korçë Laçin në sfidën që nis në ora 18:00.

Kategoria Superiore

Java e 21-të

Të shtunën, 9 shkurt 2019:

Partizani – Kastrioti              2-0

Të dielën, 10 shkurt 2019:

Kukësi – Tirana                     0-1

Luftëtari – Flamurtari            0-0

Teuta – Kamza                      (17:00)

Të hënën, 11 shkurt 2019:

Skënderbeu – Laçi               (18:00)