ASNN – Lushnja është mundur 1-0 në fushën e vet nga Pogradeci në javën e fundit të fazës së dytë të Kategorisë së Parë të Kampionatit Kombëtar të Futbollit. Ka mjaftuar një gol i realizuar nga Shkulaku, që miqtë nga Pogradeci të dalin nga Stadiumi “Roza Haxhiu” me 3 pikë. Kjo ndeshje u transmetua drejtpërdrejt nga Rrjeti i Radio-Televizionit Shqiptar.
Kështu, pas 18 javësh kampionat, Lushnja pëson humbjen e parë. Është dashur të luhej ndeshja e fundit e fazës së dytë të Kategorisë së Parë, që skuadra lushnjare të mundet në fushën e vet. Ka qenë Pogradeci që e ka mundur skuadrën e trajnerit Artan Bano, pikërisht në ndeshjen e luajtur në Stadiumin “Roza Haxhiu” të Lushnjës. Minutat e para të takimit janë të qeta dhe me pak raste.
Është Sefa që rrezikon për vendasit me një goditje me kokë, në minutën e 24-t, por largon në goditje këndi portieri i pogradecarëve, Mali. Ndërsa dukej se pjesa e parë po mbyllej 0-0, në të 45-ën minutë, është Shkulaku që kalon miqtë në epërsi. Sulm i shpejtë i Pogradecit, pasim nga krahu i djathtë dhe Shkulaku, me një goditje ballore shënon.
Kjo ishte edhe zbritja e parë e skuadrës mike në portën e Lushnjës. Me fillimin e pjesës së dytë vazhdon këmbëngulja e pogradecarëve, por, në të 63-ën minutë, Alillari nuk finalizon. Minuta e 78-të dhe provon Lushnja, por portieri Mali është në pozicion. Katër minuta më pas, Lushnja shënon, por goli i realizuar nga Canka anulohet për pozicion jashtë loje.
Minuta e 88-të, sërish shpërdoron Lushnja. Minutat shtesë të takimit rezervojnë edhe një tjetër rast për vendasit dhe është Sefa që sërish nuk arrin të shënojë në portën e mbrojtur nga Mali. Ndeshja e luajtur në Stadiumin “Roza Haxhiu” është mbyllur kështu me fitoren e Pogradecit. Por, pavarsisht kësaj humbjeje, Lushnja nuk e ka rrezikuar vendin e parë në renditjen e grupit B.
