ASNN – Ilir Daja është zyrtarisht trajner i Skënderbeut. Në daljen e tij të parë para mediave, Daja u shpreh optimist teksa deklaroi se objektivi i tij është sinkron me atë të skuadrës, të shpallet sërish “kampion”. Ai deklaroi se skuadra ka nevojë për përforcime dhe sëbashku me presidentin Takaj janë duke përzgjedhur emrat që do të veshin fanellën e kampionëve në fuqi për pjesën tjetër të sezonit.
Daja deklaroi se nuk ka një afat të përcaktuar qëndrimi në drejtimin e Skënderbeut, pasi do të jetë puna e tij dhe e skuadrës që do të vendosë për të ardhmen e tij. I pranishëm në prezantimin e trajnerit të ri, presidenti I Skënderbeut, Ardian Takaj shprehu besimin e plotë që ka ai dhe bordi drejtues i skuadrës tek aftësitë e Ilir Dajës. Të mërkurën Skënderbeu ka nisur përgatitjet për pjesën e mbetur të kampionatit.
Kështu, Ilir Daja ka nisur aventurën e re në stolin e Skënderbeut. Në konferencën e parë për shtyp si trajner i Skënderbeut, 50-vjeçari kryeqytetas ka folur për ofertën e korçarëve si dhe të shkuarën e tij në krye të Tiranës. “Janë dy gjëra që duhet t’i ndash nga njëra-tjetra, – ka thënë ai. – Nuk dua të flas për Tiranën. Është kapitull i mbyllur. Punova me devotshmëri atje dhe jam i lumtur që fitova zemrat e tifozëve të Tiranës.”
“Tani jam shumë i nderuar që më jepet mundësia që të drejtoj Skëndebeun, – ka vijuar ish-trajneri i Elbasanit, Dinamos dhe Tiranës. – Dua që të lë shenjë të mirë dhe të fitoj simpatinë e tifozëve korçarë.” Daja do të zëvendësojë Andrea Agostinelin e larguar për shkak të rezultateve dhe qëllimi kryesor është mbrojtja e titullit “kampion”. “Do të bëjmë gjithçka që t’ia dalim”, – ka theksuar ai.
“Është normale të jetë kështu, sepse kanë 6 vite që dalin “kampion”, – ka vijuar kryeqytetasi. – Më duket e logikshme. Nëse nuk dalim kampionë do jetë një dështim.” Skënderbeu do të zhvillojë fazën përgatitore në Antalia do të luajë ndeshje miqësore, një mundësi më shumë për Ilir Dajën që të njohë grupin e futbollistë dhe afrimet e mundshëm.
“Unë dua t’i marr ndeshjet me radhë, – ka thënë ai. – Do të punojmë shumë. Një ide të qartë për gjendjen përfundimtare, skemat dhe lojtarët do ta krijojmë në fund të fazës përgatitore. Shpresoj që në Turqi duke luajtur dhe miqësoret të kolaudohemi sa më mirë. Sa i përket merkato, dua të flas në parim. Klubi mendon se duhet ndërhyrë në merkato.”
“Ndërkohë më duhet të pranoj që lojtarët që kam në dispozicion janë ndër më të mirët në vend”, – ka thënë Daja, i cili do të ketë si ndihmës një ish-futbollist të njohur bardheblu, si Ardian Mema. Ilir Daja ka drejtuar disa ekipe në Shqipëri, së fundmi Tiranën. Ai është shpallur dy herë “kampion” në rolin e trajnerit, me Elbasanin në 2006-ën, dhe me Dinamon në 2008-ën.
