ASNN – Në fazën përgatitore që do të zhvillojë në Turqi, Skënderbeu do të stërvitet për 11 ditë dhe gjatë kësaj periudhe ka planifikuar të zhvillojë edhe 3 miqësore. Më 8 janar 2018, korçarët do të sfidojnë fillimisht skuadrën turke të Bursasporit, ndërsa 4 ditë më pas, do të përballen me kampione në fuqi të Turqisë, Beshiktashin, me të cilët Skënderbeu është ndeshur edhe në fazën e grupeve të Ligës së Evropës në 2015-ën.
Pas një viti fantastik dhe shumë të suksesshëm siç ishte 2017-ta, ku ka shijuar një paraqitje relativisht edhe më të mirë sesa në sezonin e saj të parë në fazën e grupeve të Ligës së Evropës, por edhe ka dominuar në gjysmën e parë të Kategorisë Superiore të Kampionatit Kombëtar të Futbollit, për Skënderbeun tashmë është koha për të shijuar pushimet.
Megjithatë, edhe pse sapo ka përfunduar kampionati për këtë vit, ku pas 16 javësh kryeson i shkëputur në kuotën e 37 pikëve, 9 më shumë sesa ndjekësja më e afërt, Flamurtari, dhe 10 më tepër sesa kampionia në fuqi, Kukësi, klubi korçar ka bërë zyrtar kalendarin përsa i përket minifazës përgatitore të dimrit. Kështu, menjëherë pas festave të fundvitit, më 3 janar 2017, skuadra e trajnerit Ilir Daja është grumbulluar në kompleksin “Tropikal”.
Dhe pas 3 ditësh stërvitjeje në Durrës, do të udhëtojë drejt Turqisë për të vazhduar seancat stërvitore në Antalia. Sipas informacionit të bërë publik nga klubi korçar, në këtë fazë përgatitore në Turqi, Skënderbeu do të stërvitet për 11 ditë dhe gjatë kësaj periudhe ka planifikuar të zhvillojë edhe 3 miqësore. Më 8 janar, korçarët do të sfidojnë fillimisht skuadrën turke të Bursasporit.
Ndërsa 4 ditë më pas, do të përballen me kampione në fuqi të Turqisë, Beshiktashin, me të cilët Skënderbeu është ndeshur edhe në fazën e grupeve të Ligës së Evropës në debutimin e saj historik në veprimtarinë e dytë të klubeve të kontinentit, në 2015-ën. Ndërkaq, miqësorja e fundit do të jetë ajo ndaj rumunëve të Viitorulit, më 15 janar, ndërsa Skënderbeu pritet të kthehet në Shqipëri më 17 janar 2018.
