ASNN – Media kroate, index.hr vlerëson kontingjentin kuqezi dhe punën e bërë nga Besnik Prenga. Gara për vendin e dytë në kampionatin kroat asnjëherë nuk ka qenë më interesante. Hajduku i Splitit, Rijeka dhe Osijeku janë konsideruar si pretendentë për vendin që të dërgon në Ligën e Kampioneve sezonin e ardhshëm dhe pak kush e ka përmendur Lokomotivën në këtë betejë. Por ajo aktualisht po e luan futbollin më të mirë në ligë dhe është favoritja më e madhe për vendin e dytë. Kështu ka shkruar faqja e njohur kroate në Internet, index.hr.
Sipas kësaj medie kroate, futbollistët e shumë shqiptarë e bëjnë dallimin te Lokomotiva e Zagrebit. Lokomotiva renditet e dyta, ndërkohë që rivalja e madhe kryeqytetase, Dinamo, e ka siguruar titullin. “Njëri prej njerëzve kyç në suksesin e Lokomotivës është Besnik Prenga”, – shkruan index.hr, duke vijuar: “Mesfushori i njohur shqiptar nga vitet 1990-të, ka mbetur në futboll dhe është lidhur ngushtë me Lokomotivën, që nga koha kur djali i tij, Herdi luajti për ekipin e parë. Sot Prenga i vjetër e kryen punën e zbuluesit kryesor të talenteve të Lokomotivës në Shqipëri e Kosovë.”
“Rezultatet janë spektakolare. Bëhet fjalë për fidanishte me shumë talente, që rrallë dhe pak shfrytëzohet”, – shton ajo. Jon Mersinaj, Enes Çokaj, Lirim Kastrati, Myrto Uzuni dhe Indrit Tuci janë ata që po e mbajnë mbi supe lojën e Lokomotivës. “Mersinaj po shndërrohet në mbrojtës shumë të mirë, – shkruan media kroate. – Çokaj është në nivel të lartë gjithë edicionin dhe si një prej mesfushorëve më të mirë me tipare mbrojtëse në kampionat dhe nuk do të qëndrojë gjatë te Lokomotiva. Uzuni, ndonëse shpesh është zgjedhja e 3-të apo 4-t në sulm, ka shënuar 9 gola e ka dhënë pasimin e fundit për 6 të tjerë.”
“Nëse ngrihet në nivelin që ishte para ndërprerjes, Lokomotiva do të arrijë një tjetër sukses në përfundim të edicionit. Kastrati është lojtari më i shpejtë në kampionatin kroat dhe për shumë vite nuk kemi parë në këtë kampionatin një lojtar që është aq i rrezikshëm në hapësirë. Tuci gjatë ka luftuar për vend në ekip, por lëvizja e tij pa top përshtatet mirë në ekip. Për një çmim shumë të ulët, Lokomotiva ka sjellë lojtarë që bëjnë dallimin me konkurrencën. Nga ato rajone vazhdimisht ka pasur lojtarë të shkëlqyeshëm. Është e pakuptimtë që klubet e mëdha kanë kërkuar përforcime të shtrenjta nga vendet e largëta, në vend të lojtarëve të lirë në vendet fqinje”, – ka përfunduar faqja e njohur kroate në Internet, index.hr.
