ASNN – Kuqezinjtë dorëzohen në fund, trajneri Bushi u jep mundësi të gjithëve të luajnë. Në atë që trajneri Alban Bushi e pati cilësuar një miqësore luksi në prag të sfidës eliminatore me Austrinë, Shpresat e Shqipërisë janë mundur të enjten me rezultatin e thellë, 0-4, në miqësoren e zhvilluar në mbrëmje në Amion. Shpresat e Shqipërisë janë mundur të enjten me rezultatin e thellë, 0-4, në miqësoren e zhvilluar në mbrëmje në Amion, në atë që trajneri Alban Bushi e pati cilësuar një miqësore luksi në prag të sfidës eliminatore me Austrinë.
Në fakt, nuk pritej të ishte e lehtë përballë asaj që është një prej përfaqësueseve më të forta të Nën-21-vjeçarëve, e për më tepër që vetë trajneri kuqezi e kishte konsideruar atë si një “banko-provë” për eliminatoren austriake. Francezët e kanë zotëruar lojën plotësisht në pjesën e parë, duke rrezikuar portën e Selmanit dhe duke gjetur edhe golin në minutën e 17-të, por që anulohet për pozicion jashtë loje. Vendasit kanë vijuar të ushtrojnë trysni në portën kuqezi dhe do të arrijnë më në fund, në minutën e 42-të, të fitojnë një 11-metërsh, që shndërrohet në gol nga Amin Guiri.
Pjesa e dytë do të karakterizohet nga ndërrimet të shumta, teksa vendasit do të bëjnë 5 zëvendësime, ndërsa, sikundër edhe kishte paralajmëruar, trajneri Bushi bëri plot 7 zëvendësime, duke u dhënë kohë të mjaftueshme loje të 18 lojtarëve që ai pati thirrur nën apel në këtë ndeshje. Këto ndërrime do të ndikojnë padyshim edhe në barazheshën dhe fizionominë dhe lojën e skuadrës, dhe francezët do të gjejnë edhe 3 gola të tjerë në 13 minutat e fundit, kryesisht për gabime në zonë apo vendosje të gabuar të mbrojtjes kuqezi.
Odson Eduard do të dyfishojë fillimisht epërsinë e vendasve në minutën e 77-të. Po i njëjti lojtar do ta çojë në 3 numrin e golave për Francën në minutën e 89-të, teksa plotëson edhe dygolëshin e tij personal në këtë ndeshje. Ka kohë edhe për një gol të fundit të Francës në minutat shtesë, të shënuar nga Den-Aksel Zagadu. Mbyllet kështu 4-0 për Francën kjo miqësore ndërsa pritet të shihet se çfarë përfundimesh ka nxjerrë trajneri Bushi nga ky test i skuadrës së tij.
